कोलम्बो। सन् २०१९ को इस्टर बम विस्फोट रोक्न असफल भएको आरोपमा शुक्रबार मृत्युदण्ड तोकिएका श्रीलङ्काका दुई पूर्व उच्च सुरक्षा अधिकारीले आफ्नो सजायविरुद्ध अपील गर्ने उनीहरूका वकिलले शनिबार बताएका छन् ।
पूर्व रक्षा मन्त्रालय सचिव हेमासिरी फर्नान्डो र पूर्व प्रहरी महानिरीक्षक पुजित जयसुन्दराविरूद्ध कोलम्बो उच्च अदालतको तीन न्यायाधीशको बेञ्चले शुक्रबार २–१ को बहुमतबाट मृत्युदण्ड सुनाएको थियो ।
स्वदेशी इस्लामी चरमपन्थीहरूको आरोप लागेको उक्त आक्रमणमा ४५ विदेशीसहित २७९ जना मारिएका थिए भने ५०० भन्दा बढी घाइते भएका थिए।
उनीहरूका वकिल चमिन्दा अथुकोरेलले दुई हप्ताभित्र सर्वोच्च अदालतमा पुनरावेदन दर्ता गर्ने बताउनुभयो ।
“असहमतिपूर्ण फैसलामा दुई आरोपितसँग हत्याको कुनै उद्देश्य नभएको र बम विस्फोटका वास्तविक दोषीसँग कुनै सम्बन्ध नभएको व्याख्या गरिएको छ,” अथुकोरेलले एएफपीसँग भन्नुभयो ।
श्रीलङ्कामा सन् १९७६ यता मृत्युदण्ड कार्यान्वयन भएको छैन। त्यहाँ मृत्युदण्ड सजायमा अनौपचारिक स्थगन कायम छ ।
फेब्रुअरीमा संसद्मा प्रस्तुत सरकारी तथ्याङ्क अनुसार मृत्युदण्डको लाइनमा ८१७ जना छन् । सामान्यतया यस्ता सजाय आजीवन कारावासमा परिणत हुन्छन् ।
दोषी करार भएका ७६ वर्षीय फर्नान्डो र ६६ वर्षीय जयसुन्दरालाई राजधानीको उच्च सुरक्षा भएको जेलमा राखिएको छ ।
उनीहरूलाई सन् २०१९ अप्रिल २१मा तीन चर्च र तीन होटललाई लक्षित गरी भएको घातक आक्रमण रोक्न आफ्नो कर्तव्य पूरा नगरेको ठहर गर्दै शुक्रबार विशेष अदालतले द्रूत प्रक्रियाबाट दोषी ठहर गरेको थियो ।
सन् २०२२ फेब्रुअरीमा अर्को उच्च अदालतको फैसलाले उनीहरूलाई हत्या वा अपराधमा सहयोग गरेको आरोपबाट सफाइ दिएको थियो ।
राज्यले त्यसविरुद्ध अपील गरेपछि सर्वोच्च अदालतले पुनः सुनुवाइको आदेश दिएको थियो, जसको नतिजा शुक्रबारको फैसला र सजाय हो।
सन् २०१९ अप्रिल ४ मा इस्लामी चरमपन्थीहरूको सम्भावित आत्मघाती आक्रमणबारे श्रीलङ्कालाई सचेत गराएको थियो तर अधिकारीहरूले त्यस सूचनामाथि कुनै ध्यान नदिएकोसुनुवाइका क्रममा अदालतलाई जानकारी गराइएको थियो ।
अघिल्लो नागरिक मुद्दामा फर्नान्डो र जयसुन्दरालाई आक्रमणबाट बाँचेकाहरूलाई १२ करोड ५० लाख श्रीलङ्काली रुपैयाँ क्षतिपूर्ति तिर्न आदेश दिइएको थियो । (रासस/एएफपी)
