काठमाडौं । नेकपा एमालेको निर्वाचन समीक्षा तथा पार्टी पुनर्गठनसम्बन्धी कार्यदलले अध्यक्ष केपी शर्मा ओलीको राजीनामा माग्ने वा पदबाट हटाउने विषय आफ्नो प्रतिवेदनमा नरहेको स्पष्ट पारेको छ ।
आइतबार पार्टी केन्द्रीय कार्यालय च्यासलमा कार्यदलको बैठकपछि सञ्चारकर्मीसँग कुरा गर्दै एमाले सचिव तथा कार्यदलका सदस्य महेश बस्नेतले अध्यक्षको राजीनामा माग्ने, हटाउने वा आलोचना गर्ने विषय प्रतिवेदनमा नरहेको बताउनुभयो ।
उहाँका अनुसार बलथली बैठकपछि विभिन्न मस्यौदा तथा १३ वटा समूहबाट प्राप्त सुझावलाई समेटेर एकीकृत प्रतिवेदन तयार गर्ने जिम्मेवारी रामबहादुर थापा ‘बादल’, विष्णु पौडेल र शंकर पोखरेललाई दिइएको थियो । तीन नेताले तयार पारेको एकीकृत प्रतिवेदनका आधारमा कार्यदलमा थप छलफल गरी साझा प्रतिवेदन तयार गरिएको बस्नेतले जानकारी दिनुभयो ।
कार्यदलले तत्काल विशेष महाधिवेशन वा विशेष विधान महाधिवेशन नबोलाउने सहमति गरेको छ । यद्यपि, नियमित महाधिवेशनमा नेतृत्व परिवर्तनको विषय स्वाभाविक रूपमा उठ्न सक्ने र त्यसलाई रोक्न नसकिने बस्नेतको भनाइ छ ।
त्यस्तै, नियमित विधान महाधिवेशनमा ७० वर्षे उमेर हद, दुई कार्यकाललगायत विगतका निर्णय तथा विधानसम्बन्धी विषयमा छलफल गर्न सकिने उहाँले बताउनुभयो ।
कार्यदलले पार्टीको एकता सुदृढ गर्न राष्ट्रिय प्रतिनिधि परिषद्को बैठक बोलाउने विषयमा पनि सहमति गरेको छ । वर्तमान सरकारका ‘अधिनायकवादी, प्रतिशोधपूर्ण र जनविरोधी’ गतिविधिविरुद्ध आन्दोलन अघि बढाउने उद्देश्यसहित परिषद्को बैठक बोलाउने सहमति भएको बस्नेतले बताउनुभयो ।
बस्नेतले १३ वटा समूहबाट आएका सुझावलाई प्रतिवेदनको अनुसूचीमा समेटिने जानकारी दिनुभयो । कार्यदलले तयार गरेको २९ पृष्ठको साझा प्रतिवेदन आइतबार सचिवालय बैठकमा र सोमबार बस्ने केन्द्रीय कमिटी बैठकमा प्रस्तुत गरिने उहाँले बताउनुभयो ।
कार्यदलले प्रतिवेदन सर्वसम्मत रूपमा पारित गरेको पनि बस्नेतले जानकारी दिनुभयो । साथै, प्रतिवेदनलाई लिएर बाहिर आएका विभिन्न चर्चा तथा सामाजिक सञ्जालमा भइरहेको प्रचारबाट भ्रममा नपर्न उहाँले आग्रह गर्नुभयो।
