काठमाडौं । प्रतिनिधि सभा विघटनविरुद्ध परेका रिटमाथिको सुनुवाइ सर्वोच्च अदालतको संवैधानिक इजलासमा जारी छ ।

मंगलबार मुद्दाको सुनुवाइमा बहस गर्दै अधिवक्ता हर्कबहादुर रावलले अहिले कुनै शासकले पृथ्वीनारायण शाह, हिटलर वा विन्सटन चर्चिलको पद्धति खोज्न नपाउने बताउदै उनले संविधानले तोकेभन्दा बाहिरको सीमामा कोही जान नसक्ने तर्क गरेका हुन् ।

'यहाँ आज आएर कुनै शासकले पृथ्वीनारायण, हिटलर वा चर्चिलको पद्धति खोज्न पाउँदैन', उनले भने, 'यस्तो पद्धति आजको हाम्रो संविधानले स्वीकार्दैन । हाम्रो पद्धतिले शासकको विशेषाधिकार हेर्दैन । नगरिकका विशेषाधिकार हेर्छ ।'

संविधानले  प्रधानमन्त्रीलाई संसद विघटनको विशेषाधिकार नदिइएको उनको तर्क छ । 

त्यसपछि रावललाई प्रधानन्यायाधीश चोलेन्द्र शमशेर जबराले प्रश्न गरे, 'प्रधानमन्त्रीले संसदमा जाने, संसदीय दलमा गएर सबै प्रक्रिया पूरा गर्यो अनि पनि विघटन गर्यो भने के गर्ने ? त्यसको हल के छ ?' 

रावलको जवाफ नआउँदै जबराले पुनः सोधे, 'संसद्ले सहयोग गरेन भने विघटन गर्न पाउँछ ?'

रावलले उत्तर दिए, 'पाउँदैन ।' 

जबराले फेरि सोध, 'प्रधानमन्त्री होइन, दलले नै चलाउँदिनँ भन्यो भने के गर्ने ?'

रावलले त्यही उत्तर दिए, 'पाउँदैन ।'