काठमाडौँ । नवगठित जनता समाजवादी पार्टीका अध्यक्ष अशोककुमार राईले उपेन्द्र यादवसँग असन्तुष्टि चुलिँदै गएपछि नयाँ पार्टी बनाउनुपरेको बताउनुभएको छ ।
निर्वाचन आयोगले दिएको दल दर्ताको पत्र संसद सचिवालयमा बुझाउन सोमवार अपरान्ह सिंहदरवार पुग्नुभएका उहाँले न्युज एजेन्सी नेपालसँग संक्षिप्त प्रतिक्रिया दिँदै सो कुरा बताउनुभएको हो । पार्टीको आसन्न महाधिवेशनमा लाठे रोपाईं हुने स्थिति देखिएपछि त्यही पार्टीमा बस्ने कुरा राम्रो नहुने भएको भन्दै नयाँ पार्टी दर्ता गरेर जाने आफूहरु निष्कर्षमा पुगेको बताउनु भयो ।
अध्यक्ष राईले सत्ता राजनीतिका कारण आफूहरुले पार्टी विभाजन नगरेको जिकिर पनि गर्नुभयो । सांसदहरुले संसदीय दल विभाजन गरेको हुनाले सत्ता राजनीतिसँग कुनै न कुनै रुपमा जोडिन जाने भएपनि सत्ता राजनीतिको कारण पार्टी विभाजन नभएको उहाँको भनाई थियो । अध्यक्ष राईले आफ्नो पार्टीले अब संसदमा रचनात्मक क्रियाकलाप गर्दै अघि बढ्ने बताउनु भयो ।
उहाँले भन्नुभयो, ‘अब यो चाहीँ पानी उमाल्ने क्रममा तापक्रम बढ्दै बढ्दै जान्छ । सय डिग्री पुगेपछि पानी उम्लिन्छ भन्ने एउटा बैज्ञानिक चाहीँ नियम छ । त्यस्तै हो । अब यहाँहरुले सार्वजनिक क्षेत्रले हेर्दाखेरी एकैचोटी जस्तो भयो । तर कुनै पनि घटना एकैचोटी हुँदैन । त्यसका पछाडि कारणहरु हुन्छन । र त्यसले विकास गर्नका निम्ति अलिकति समय लिएको हुन्छ, प्रक्रियाहरु पार गरेको हुन्छ । अब विकास क्रमको कुरा भन्ने हो भने कार्यशैलीगत चाहीँ बेमेलहरुले उत्पन्न गरेका असन्तुष्टिहरु थुप्रिँदै थुप्रिँदै जाने र ती सबै चिजहरुको निकास, समाधान खोजेर एकीकृत र सुदृढ पार्टी बनाउने, पार्टीमा उर्जा भर्ने ढंगले महाधिवेशन आयोजना गर्नुपर्ने ।
अब महाधिवेशन नै लाठे रोपाईँ होला जस्तो देखिएपछि अब धेरै असन्तुष्टि,अन्तरविरोध बढाएर पार्टीमा रहिरहनु त्यो राम्रो पनि हुँदैन । राम्रो पनि देखिदैन । बरु अलग भएर प्रितीकर सम्बन्ध, सुसम्बन्ध, हार्दिकता पचाईरहनु चाहीँ बेस हुन्छ । एकैठाउँमा बसेर विवाद, बहस गर्ने, अब चाहीँ त्यो खालको असन्तुष्टिहरु पाल्ने स्थिति हुनु भन्दा राम्रो हो । र, अर्को कुरा चाहीँ अब नौ वर्ष भयो । एकता भएर मधेसी जनअधिकार फोरम र संघीय समाजवादी पार्टीको एकता भएर नौ वर्ष भयो । नौं वर्षको सहकार्यमा हामीले भौतिक रुपमा देखिने गरी प्रगति पनि गर्न सकेनौं एकता पछि पनि ।
जव महाधिवेशन आयोजना गर्ने प्रक्रिया नै विवादास्पद छ । विधिसम्मत छैन । र जब्बरजस्तीको जोड छ भने पछि त्यो महाधिवेशनले के निकास दिन्छ, के निर्णय दिन्छ भनेर अपेक्षा गर्ने । त्यसकारण हामीले चाँही बरु बेस हुन्छ हामी चाहीँ आ आफ्नो ढंगले अघि बढौं भनिकन हामीले यो निर्णय गर्यौँ । यो निर्णयमा हामी पुग्यो । हामीले दल दर्ताको निम्ति निर्णय लियौं । र आज दल दर्ता चाँही भएको छ । र, अव यसको आधारमा हामी आफ्नो चाँही रचनात्मक क्रियाकलापहरु अगाडि लैजान्छांै । सत्ता राजनीति त हामी सांसदहरुले संसदीय दलबाट विभाजन गरेको हुनाले सत्ता राजनीतिसँग त कुनै न कुनै रुपमा प्रत्यक्ष, परोक्ष रुपमा जोडिन जान्छ । तर सत्ता राजनीतिको कारण चाँही होइन यो विभाजनको । सत्तामा नै छौ नि त हामी त । हाम्रो त वनमन्त्रीजी अहिले सरकारमा हुनुहुन्छ ।
उहाँले अगुवाई गरिरहनु भएको छ यो विभाजनमा । हामी सत्तामा नै छौं । त्यसको निम्ति त अरु के राजनीति गर्नु पर्यो । सत्तामा जानका निम्ति हामीले राजनीति गर्नुपर्ने, हामी सत्तामा नै छौं । गठबन्धन फेरबदल गर्ने कुरा मिडियाको कुरा हो । मिडियामा पढेर मैले थाहा पाएको । त्यस्तो तथ्यगत कुरा केही छ भने यहाँहरुलाई नै जानकारी होला ।
गठबन्धन चाहीँ फेरफार गर्ने हिसावबाट कोही लागेको छ, कुनै शक्ति लागेको छ, कोही व्यक्ति लागेको छ भन्ने कुराको तथ्यगत जानकारी मलाई छैन । त्यसकारण यो कुरालाई अहिले हाम्रो यो दल दर्तासँग जोडन आवश्यक छैन । त्यो सम्बन्धमा हामीसँग उहाँले कुनै कुरा राख्नुभएको छैन । यो त एउटा संयोग हो । कहिलेकाहीँ यस्तो संयोग हुन्छ । अब शिकारी हराउने, चितुवा कराउने भएजस्तो हुने गर्छ कहिलेकाहीँ घटनाहरु त्यस्तो हुन्छ । त्यसैकारण यो उखान बनेको हो शिकारी हराउने, चितुवा कराउने । ’
अध्यक्ष राईले यादवले सत्ता गठबन्धन फेरबदल गर्ने कुराबारे आफूहरु बेखबर रहेको पनि बताउनु भयो ।
