काठमाडौं । उज्यालो नेपाल पार्टीका अध्यक्ष कुलमान घिसिङले विपद्पछि शव व्यवस्थापन र अवरुद्ध सडक सञ्जाल पुनःस्थापनालाई उच्च प्राथमिकतामा राखेर काम अघि बढाउन सरकारको ध्यानाकर्षण गराउनुभएको छ ।
बिहीवार सिंहदरबारमा प्रधानमन्त्री बालेन्द्र साहसँग भेट गर्दै अध्यक्ष घिसिङले स्थलगत अवलोकनका क्रममा देखिएका समस्या तथा स्थानीयस्तरमा देखिएको आक्रोशबारे जानकारी गराउनुभएको हो ।
प्रधानमन्त्रीसँगको भेटपछि सञ्चारकर्मीसँग कुरा गर्दै घिसिङले शव व्यवस्थापनमा भएको ढिलाइप्रति स्थानीय बासिन्दा र जनप्रतिनिधिमा ठूलो असन्तुष्टि रहेको बताउनुभयो । विपद्पछि तत्काल शव व्यवस्थापन गर्नुपर्ने भन्दै उहाँले यस विषयलाई सरकारले गम्भीरताका साथ लिनुपर्नेमा जोड दिनुभयो ।
घिसिङले अवरुद्ध सडक सञ्जाल पुनः सञ्चालनमा पनि विशेष प्राथमिकता दिनुपर्ने बताउनुभयो । सडक कनेक्टिभिटीमा ढिलाइ हुँदा उद्धार, राहत तथा पुनःस्थापनाका काम प्रभावित हुने भएकाले सडक सञ्चालनलाई प्राथमिकताका साथ अघि बढाउन आफूले सरकारलाई सुझाव दिएको उहाँले जानकारी दिनुभयो ।
भेटका क्रममा विपद्पछि होल्डिङ सेन्टरमा आश्रय लिइरहेका बालबालिका, महिला तथा ज्येष्ठ नागरिकको अवस्थाबारे पनि छलफल भएको उहाँले बताउनुभयो । ती केन्द्रमा स्वास्थ्य, सामाजिक सुरक्षा तथा अन्य आधारभूत सेवाको उचित व्यवस्थापन गर्नुपर्ने आवश्यकता रहेको उहाँको भनाइ छ ।
प्रधानमन्त्री साहले होल्डिङ सेन्टरमा रहेका बालबालिकालाई काठमाडौं ल्याएर उचित व्यवस्थापन गर्ने प्रतिबद्धता जनाएको घिसिङले जानकारी दिनुभयो ।
उहाँले विपद्को पूर्वतयारीमा कमजोरी रहेको स्वीकार गर्दै आगामी दिनमा त्यस्ता कमजोरी सच्याउनुपर्नेमा जोड दिनुभयो । ठूलो विपद्का कारण पूर्वतयारीमा भएका कमी कमजोरीसमेत देखिएको भन्दै घिसिङले सरकारसहित सबै पक्ष एकताबद्ध भएर समस्या समाधानमा केन्द्रित हुनुपर्ने बताउनुभयो ।
‘अब शव व्यवस्थापनको विषयमा गम्भीर रूपमा सोच्नुपर्छ । शव व्यवस्थापनमा केही ढिलाइ भयो भन्ने स्थानीय जनता र स्थानीय निकायको आक्रोश हामीले बुझेका छौँ र फिल्डमा देखिएका विषय प्रधानमन्त्रीसमक्ष राखेका छौँ,’ उहाँले भन्नुभयो ।
विपद्को यो घडीमा सरकार गम्भीर भएर अघि बढ्नुपर्ने र सबैले जिम्मेवार ढङ्गले सहयोग गर्नुपर्नेमा उहाँले जोड दिनुभयो ।
