काठमाडौं । नेपाली कांग्रेसको १५औँ महाधिवेशन नजिकिँदै गर्दा नयाँ पुस्ताको भूमिका र पार्टीभित्र पुस्तान्तरणको बहस थप तीव्र बन्दै गएको छ । यसै पृष्ठभूमिमा कांग्रेस नेत्री बिनिता खड्काले नेतृत्वमा नयाँ पुस्ताको उपस्थिति केवल उमेर घटाउने विषय नभई संघर्ष गर्ने, जोखिम उठाउने र जिम्मेवारी सम्हाल्ने राजनीतिक संस्कार विकास गर्ने विषय भएको बताएकी छन् ।
खड्काले सभापति गगन थापाको राजनीतिक यात्राबाट अहिलेका युवाले साहस र राजनीतिक प्रतिबद्धताको पाठ सिक्नुपर्ने धारणा राखिन् । सहज बाटो रोजेर नयाँ नेतृत्व स्थापित नहुने भन्दै उनले आफ्नो विश्वासको विषयमा उभिन सक्ने र आवश्यक पर्दा जोखिम लिन सक्ने युवाको आवश्यकता रहेको पनि बताइन् ।
“गगन थापाले गर्नुभएको संघर्ष र उहाँले लिनुभएको राजनीतिक जोखिमबाट अहिलेको पुस्ताले सिक्नुपर्छ । नेतृत्वमा आउनु भनेको पदमा पुग्नु मात्रै होइन, कठिन समयमा पनि आफ्नो विचारमा उभिन सक्नु हो । अबका युवाले पनि त्यही हिम्मत गर्नुपर्छ,” खड्काले भनिन् ।
उनले आफू त्यस्ता युवालाई राजनीतिक यात्रामा अघि बढ्न सहयोग गर्ने बताएकी छन् । उनका अनुसार नयाँ पुस्तालाई पार्टीमा जोड्ने बहस केवल प्रतिनिधित्व र संख्यामा सीमित राखेर पुग्दैन । निर्णय प्रक्रियामा सहभागी हुने, जिम्मेवारी लिने र आफ्नो क्षमताअनुसार नेतृत्व गर्ने अवसर पनि सिर्जना गर्नुपर्छ ।
खड्काको भनाइमा अहिलेको पुस्ताले गगन थापाको शैलीको नक्कल गर्नुभन्दा उहाँले देखाउनुभएको राजनीतिक अभ्यासबाट सिक्नुपर्छ । असहज विषयमा पनि बोल्ने, स्थापित धारणासँग आवश्यक पर्दा असहमति राख्ने र परिवर्तनका लागि राजनीतिक जोखिम मोल्ने संस्कारलाई उनले नयाँ पुस्ताको नेतृत्व विकाससँग जोडिन् ।
“हामीले गगन थापाजस्तो बन्ने होइन, उहाँले देखाउनुभएको साहसबाट आफ्नो बाटो बनाउने हो,” खड्काले भनिन्, “हाम्रो पुस्ताले प्रश्न गर्न सक्नुपर्छ, निर्णय लिन सक्नुपर्छ र निर्णयको जिम्मेवारी पनि लिन सक्नुपर्छ ।”
कांग्रेसलाई नयाँ पुस्तासँग जोड्ने सवालमा खड्काले पार्टीको कार्यशैली पनि बदलिनुपर्ने बताइन्। युवालाई चुनावी अभियानका बेला परिचालन गर्ने र त्यसपछि फेरि पर्खाइमा राख्ने प्रवृत्तिले पुस्तान्तरण सम्भव नहुने उनको तर्क छ ।
उनका अनुसार “नाराभन्दा नीति, भाषणभन्दा परिणाम र पदभन्दा जिम्मेवारी” लाई प्राथमिकता दिने राजनीतिक संस्कार अब कांग्रेसको संगठनात्मक अभ्यास बन्नुपर्छ । नागरिकले चुनावका बेला मात्र होइन, समस्या पर्दा पनि सम्झने पार्टीका रूपमा कांग्रेसलाई स्थापित गर्नुपर्ने उनको जोड छ ।
सभापति गगन थापाले पनि कांग्रेसलाई केवल निर्वाचनमा केन्द्रित पार्टीका रूपमा नराखी समाजसँग जोड्ने र नागरिकको भरोसा जित्ने विषयलाई प्राथमिकतामा राख्नुपर्ने सार्वजनिक धारणा राख्दै आएका छन् ।
कांग्रेसको १५औँ केन्द्रीय महाधिवेशन असोज १६ देखि १९ गतेसम्म गर्ने कार्यतालिका छ । पार्टीको निर्वाचन समितिका अनुसार अहिले विभिन्न तहका अधिवेशनको प्रक्रिया अघि बढिरहेको छ ।
खड्काले महाधिवेशनलाई आफू वा कुनै एक समूहको राजनीतिक अवसरभन्दा पनि कांग्रेसले आगामी दिनमा कस्तो संगठन र कस्तो राजनीतिक संस्कार अपनाउने भन्ने बहसको थलो बनाउनुपर्ने बताएकी छन् ।
“हामीले पुरानो पुस्ताको संघर्षबाट विरासत पाएका छौँ । अब त्यसमा हाम्रो पुस्ताको साहस र काम थप्नुपर्छ । पद पाएपछि मात्र जिम्मेवारी सुरु हुँदैन, जिम्मेवारी लिन तयार भएपछि नेतृत्वको यात्रा सुरु हुन्छ,” खड्काले भनिन् ।
