काठमाडौँ । रसुवाको लाङटाङ खोला जलविद्युत आयोजनाको सुरुङबाट दुई जनाको शव निकालिएको छ। नेपाली सेनाका उद्धारकर्मीले सुरुङभित्र पहुँच मार्ग निर्माण गरी बुधबार साँझ दुई शव बाहिर निकालेका हुन्।
सुरुङबाट निकालिएका शव नुवाकोट ल्याइएको छ। उद्धार कार्यमा समन्वय गरिरहेका अधिकारीका अनुसार नेपाली तथा विदेशी नागरिकसहित २५ जनाको संयुक्त खोज तथा उद्धार टोली सुरुङभित्र करिब १५० मिटरसम्म प्रवेश गरेको छ।
नेपाली सेनाको सैनिक जनसम्पर्क तथा सूचना निर्देशनालयका अनुसार अहिले सुरुङको दुई स्थानबाट प्वाल बनाएर खोज तथा उद्धार कार्य जारी राखिएको छ। सुरुङभित्र थप व्यक्ति फसेको हुनसक्ने आशंकामा उद्धार टोलीले खोजीलाई निरन्तरता दिएको हो।
भोटेकोशी नदीमा आएको बाढी तथा त्यसबाट प्रभावित क्षेत्रमा बेपत्ता भएकाहरूको खोजीका क्रममा सेनाले जलविद्युत आयोजनाका सुरुङ तथा जोखिमपूर्ण क्षेत्रमा उद्धार अभियान सञ्चालन गरिरहेको छ।
