काठमाडौं । प्रधानमन्त्री बालेन्द्र शाहसँग नेपाली कम्युनिष्ट पार्टीका नेता वर्षमान पुनले आज भेटवार्ता गर्नुभएको छ ।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटमा रसुवाको भोटेकोशी नदीमा आएको बाढीबाट उत्पन्न विपद् तथा त्यसपछिको खोज, उद्धार, उपचार र राहत वितरणका विषयमा छलफल भएको हो ।
भेटमा बाढीबाट प्रभावित नागरिकको उद्धार तथा उपचारलाई प्रभावकारी बनाउने, प्रभावित क्षेत्रमा राहत पुर्याउने र बेपत्ताको खोजी कार्यलाई तीव्रता दिने विषयमा कुराकानी भएको जनाइएको छ ।
यस्तै, बाढीका कारण क्षतिग्रस्त भएका सडक, पुल, जलविद्युत्लगायतका पूर्वाधारलाई शीघ्र पुनः सञ्चालनमा ल्याउने तथा प्रभावित क्षेत्रको पुनःस्थापना र पुनर्निर्माणलाई प्रभावकारी ढङ्गले अघि बढाउने विषयमा पनि प्रधानमन्त्री शाह र नेता पुनबीच छलफल भएको छ ।
प्रधानमन्त्री शाहले विपद्पछिको अवस्थालाई सामान्य बनाउन सरकारका तर्फबाट भइरहेका उद्धार, राहत तथा पुनःस्थापनाका प्रयासबारे जानकारी गराउनुभएको बताइएको छ ।
यसअघि प्रधानमन्त्री शाहसँग उज्यालो नेपाल पार्टीका अध्यक्ष कुलमान घिसिङले पनि भेटवार्ता गर्नुभएको थियो । सिंहदरबारमा भएको उक्त भेटमा पनि रसुवाको भोटेकोशी बाढीबाट उत्पन्न विपद्, उद्धार तथा राहत र प्रभावित क्षेत्रका पूर्वाधार पुनःस्थापनालगायत विषयमा छलफल भएको थियो।
