काठमाडौं । नेपाली सेनाले रसुवास्थित भोटेकोशीमा आएको बाढीका कारण सम्पर्कविहीन भएका सैनिकका परिवारजनसँग समन्वय गर्न ‘हेल्प डेस्क’ सञ्चालनमा ल्याएको छ ।
सैनिक प्रवक्ता सहायक रथी राजाराम बस्नेतले बाढीमा हराइरहेका सैनिकका परिवारजनसँग सेनाको सम्पर्क भइसकेको जानकारी दिनुभयो । उहाँका अनुसार परिवारजनलाई आवश्यक सूचना उपलब्ध गराउन तथा समन्वय गर्न हेल्प डेस्क सञ्चालनमा ल्याइएको हो ।
यही भदौ १० गते भोटेकोशी नदीमा आएको विनाशकारी बाढीमा परी लाङ्टाङ राष्ट्रिय निकुञ्ज तथा त्यस क्षेत्रमा रहेका जलविद्युत् आयोजनाको सुरक्षार्थ खटिएका ४५ जना सैनिक सम्पर्कविहीन भएका छन् ।
नेपाली सेनाले सम्पर्कविहीन सैनिकको खोजी कार्य निरन्तर जारी राखेको जनाएको छ । जङ्गी अड्डाका अनुसार रसुवाको टिमुरेदेखि नवलपुरसम्म परिचालित सैन्य टोलीलाई बाढीमा हराइरहेका नागरिक तथा सैनिकको विवरणबारे जानकारी गराई खोज तथा उद्धारमा केन्द्रित गरिएको छ ।
सेनाले बाढी प्रभावित क्षेत्रमा खोज तथा उद्धार कार्यलाई थप प्रभावकारी बनाउन परिचालित टोलीलाई आवश्यक समन्वय र निर्देशन दिइरहेको जनाएको छ ।
