काठमाडौँ । इन्डियन प्रिमियर लिग–२०२४ मा गुजरात टाइटन्स (जीटी)ले दोस्रो जित हात पारेको छ । टोलीले चालू सिजनको १२ औं खेलमा सनराइजर्स हैदरावाद (एसआचएच)लाई ७ विकेटले पराजित गरेको हो ।
यो जितसँगै गुजरातको टोली अंक तालिकाको चौथो स्थानमा उक्लिएको छ भने हैदराबाद पाँचौं स्थानमा छ ।
अहमदाबादमा आइतबार भएको पहिलो खेलमा सनराइजर्स हैदरावादले टस जितेर ब्याटिङ रोजेको थियो । पहिले ब्याटिङ थालेको टोलीले २० ओभरमा ८ विकेट गुमाएर १६२ रन बनायो ।
गुजरातका ब्याट्सम्यानले १९.१ ओभरमा ३ विकेट गुमाएर १६३ रनको लक्ष्य पुरा गरे ।
साई सुदर्शनले ३६ बलमा ४५ रनको इनिङ खेले भने डेभिड मिलरले २७ बलमा अविजित ४४ रन बनाए । कप्तान शुभमन गिलले ३६ र ऋद्धिमान साहाले २५ रनको योगदान दिए ।
एसआरएचका लागि अभिषेक शर्मा र अब्दुल समदले २९–२९ रन बनाए । हेनरिक क्लासेनले २४ रनको योगदान दिए । गुजरातका मोहित शर्माले तीन विकेट लिए ।
