एजेन्सी । आईपीएल २०२४ मार्च २२ बाट सुरु हुन गइरहेको छ र फेरि एक पटक सबै १० टोलीहरूबीच चम्किलो ट्रफी जित्नको लागि भिडन्त हुनेछ ।
मोहम्मद शामी जस्ता प्रतिभाशाली बलर र जेसन रोय जस्ता विस्फोटक ब्याट्सम्यान लगायत धेरै खेलाडीले विभिन्न कारणले यस पटकको आईपीएल खेल्न नसकेपनि केही नयाँ नियमले २०२४ मा हुने यो प्रतियोगितालाई विशेष बनाउँदैछ ।
यहाँ हामी केही नयाँ नियमहरू बारे जानौं, जुन हामी इन्डियन प्रिमियर लिगको आगामी सिजनमा देख्नेछौं ।
बलरहरूले १ ओभरमा २ बाउन्सर बलिङ गर्न सक्नेछन्
यदि हामी अन्तर्राष्ट्रिय स्तरमा खेलिएका टी–२० म्याचहरूको कुरा गर्छौं भने, एक बलरले एक ओभरमा एउटा मात्र बाउन्सर बल गर्न सक्छ ।
अहिलेसम्म आईपीएलमा पनि यस्तो भइरहेको थियो तर २०२४ सिजनमा यो नियम परिवर्तन गरिएको छ । अब बलरले एक ओभरमा २ बाउन्सर बल गर्न सक्नेछन् । यसअघि यो नियम भारतको टी–२० घरेलु प्रतियोगिता सैयद मुश्ताक अली ट्रफीमा प्रयोग भइसकेको छ । यसले बलरहरूलाई फाइदा पुर्याउनेछ र प्रतिस्पर्धाको स्तर पनि बढ्छ ।
डीआरएसको स्थानमा स्मार्ट रिभ्यु सिस्टम
आईपीएल २०२४ मा अर्को नयाँ नियम अब डीआरएसको सट्टा स्मार्ट रिभ्यु सिस्टम प्रयोग गरिनेछ । ईएसपीएन क्रिकइन्फोको रिपोर्टका अनुसार अब फिल्डमा ८ वटा हक–आइ क्यामेरा जडान गरिने छ, जसले थप सही निर्णय लिन मद्दत गर्नेछ ।
अब टिभी अम्पायरलाई एउटै कोठामा दुई हक–आई अपरेटर बसेर मैदानमा भइरहेका गतिविधिमाथि निगरानी राख्न सक्नेछन् ।
अहिलेसम्म टिभी प्रसारण निर्देशकले टिभी अम्पायर र हक–आइ अपरेटरबीच सम्पर्कको भूमिका निर्वाह गर्ने गरेको भए पनि अब हक–आइको क्यामेराबाट खिचिएका तस्विर टिभी अम्पायरकै अगाडि नै प्रस्तुत गरिने भएको छ ।
