एजेन्सी । चेन्नई सुपर किंग्सका सीईओ काशी विश्वनाथनले महेन्द्र सिंह धोनीको फिटनेसको बारेमा अपडेट दिएका छन् । धोनी आईपीएल २०२४ भन्दा पहिले पूर्ण रूपमा फिट हुनेछन् । धोनी पुनर्वास गर्दै छन् । उनले १० दिनपछि नेटमा अभ्यास सुरु गर्नेछन् ।
आईपीएल २०२३ को सुरुवातमै धोनीलाई घुँडाको चोट लागेको थियो । उनी आईपीएलभर पट्टी लगाएर मैदानमा खेलिरहेको देखिन्थे । धोनीले आफ्नो कप्तानीमा चेन्नईलाई पाँचौं पटक आईपीएलको उपाधि दिलाएका थिए ।
फाइनलमा चेन्नईले गुजरात टाइटन्सलाई हराएको थियो । आईपीएलको लगत्तै धोनीको मुम्बईस्थित कोकिला बेन अस्पतालमा घुँडाको शल्यक्रिया गरिएको थियो ।
काशी विश्वनाथनले धोनी आफैँले आईपीएलबाट सन्यासको घोषणा गर्ने बताएका छन् । उनले सन्यासबारे कसैलाई केही भनेनन् । ‘जब समय आउँछ उनी आफैँ भन्नेछन् ।’ विश्वनाथनले भने ।
गत सिजनको खेलमा धोनी जहाँ गए पनि उनलाई समर्थन गर्न पहेँलो जर्सी लगाएर फ्यानहरु रंगशालामा पुगेका थिए । उनले पटक–पटक उनको अन्तिम आईपीएल हुनसक्ने संकेत दिँदै आएका छन् ।
धोनीले यो निर्णय पछि लिनेछन् । चेन्नईले आईपीएल २०२४ मा धोनीलाई रिटेन गरेको छ । उनी यो सिजन पनि टिमको कप्तानीमा देखिनेछन् ।
आगामी सिजनको तयारीका सम्बन्धमा काशीले यस टोलीको तयारी अर्को वर्ष मार्चको पहिलो साताबाट चेन्नईमा सुरु हुने र मार्चको पहिलो हप्तामा शिविर आयोजना गर्ने योजना रहेको बताए ।
