काठमाडौँ । राष्ट्रिय प्रजातन्त्र पार्टी (राप्रपा)को केन्द्रीय कार्यसमितिको बैठक पौष १, २ र ३ गते काठमाडौँमा बस्ने भएको छ ।
धुम्बाराहीस्थित एसआर बैंक्वेटमा बस्ने बैठक भोलि पौष १ गते बिहान ८ः०० बजेबाट प्रारम्भ हुने सो पार्टीका प्रवक्ता एवं प्रचार विभाग प्रमुख मोहनकुमार श्रेष्ठले जानकारी दिनुभयो ।
उहाँका अनुसार बैठकमा अध्यक्ष राजेन्द्र लिङ्देनले समसामयिक राजनीतिक परिस्थितिको समिक्षा, पार्टीको रणनीति र भावी कार्यदिशा सम्बन्धमा ब्रिफिङ् गर्नुहुनेछ, सचिवालय र कोषाध्यक्षको प्रतिवेदन प्रस्तुत हुनेछन् ।
यस्तै, बैठकमा भूगोल केन्द्रीत कार्यक्रमको समिक्षा र समूहगत छलफल हुनेछ । पार्टीले निकट भविष्यमा सञ्चालन गर्ने र केन्द्रीय कार्यसम्पादन समितिको बैठकले पारित गरी अनुमोदनका लागि अनुमति प्रदान गरेको आन्दोलन सम्बन्धि प्रस्तावमाथि पनि छलफलका लागि पेश हुने उहाँले बताउनुभयो ।
बैठक विभिन्न निर्णय गर्दै पौष ३ गते समापन हुने प्रवक्ता श्रेष्ठले जानकारी दिनुभयो ।
