रुपन्देही। रुपन्देही प्रहरीले शुद्धोधन गाउँपालिका-४ स्थित हाटबजारमा एक महिलाको घाँटीबाट सुनको सिक्री लुटिएको घटनामा संलग्न रहेको आरोपमा पाँच जनालाई पक्राउ गरेको छ।
जिल्ला प्रहरी कार्यालय रुपन्देहीका अनुसार साउन ९ गते भीडभाडको अवसर पारेर करिब दुई तोलाको सुनको सिक्री झिकेर फरार भएको घटनाको अनुसन्धानका क्रममा गिरोहलाई जिल्लाका विभिन्न स्थानबाट सवारीसाधनसहित नियन्त्रणमा लिइएको हो।
पक्राउ पर्नेमा रुपन्देहीको सिद्धार्थनगर नगरपालिका-११ निवासी ३१ वर्षीय अकलेश बृजवासी, पर्साको वीरगञ्ज महानगरपालिका-२० निवासी २८ वर्षीय राजन राय, वीरगञ्ज महानगरपालिका-१६ का एक नाबालक, सोही वडा निवासी २१ वर्षीय अमन राय तथा भारतको बिहार राज्य, मोतिपुर प्रदेशअन्तर्गत रामगणवा थाना क्षेत्रका ४० वर्षीय मोहम्मद इमाम रहेका छन्।
प्रहरीले घटनामा प्रयोग भएको बा १९ च ४३७७ नम्बरको स्कारपियो, सुनजस्तो देखिने एक थान सिक्री तथा चार थान मोबाइल फोन बरामद गरेको जनाएको छ।
प्रहरीका अनुसार पक्राउ परेका पाँचै जनाविरुद्ध चोरी सम्बन्धी कसुरमा रुपन्देही जिल्ला अदालतबाट पाँच दिनको म्याद थप अनुमति प्राप्त गरी थप अनुसन्धान अघि बढाइएको छ।
