एजेन्सी । अस्ट्रेलियाले बिहीबार विश्वकप २०२३ को दोस्रो सेमिफाइनलमा दक्षिण अफ्रिकालाई ३ विकेटले पराजित गर्दै आठौं पटक फाइनलमा प्रवेश गरेको छ । यसैबीच अष्ट्रेलियाका कप्तान प्याट कमिन्सले आफ्नो टोली भारतविरुद्धको फाइनलको प्रतिक्षामा रहेको बताएका छन् ।
विश्वकप २०२३ को फाइनल खेल भारत र अस्ट्रेलियाबीच १९ नोभेम्बरमा अहमदाबादको नरेन्द्र मोदी स्टेडियममा हुनेछ । यो खेल हेर्न १ लाख ३० हजारभन्दा बढी दर्शक स्टेडियममा पुग्नेछन् । सेमिफाइनलमा न्युजिल्याण्डलाई ७० रनले पराजित गर्दै भारत चौथो पटक फाइनलमा प्रवेश गरेको छ ।
कप्तान प्याट कमिन्सले भने, ‘रंगशाला दर्शकले खचाखच भरिनेछ । सायद दर्शकको समर्थन एकतर्फी हुनेछ तर हामी यसको आनन्द उठाउनेछौँ । हाम्रा लागि राम्रो कुरा के हो भने हाम्रा केही खेलाडी यसअघि पनि फाइनलमा पुगेका छन् । २०१५ को विश्वकप हाम्रो करियरको हाइलाइट थियो, त्यसैले अब हामीले भारतमा फाइनल खेल्नुपर्छ, जसका लागि हामी उत्सुक छौं ।’
कमिन्सले आफ्नो टोलीले आफ्नो फिल्डिङ स्तरमा निकै सुधार गरेको पनि बताए । कमिन्सले भने, ‘हामीले यसबारे धेरै कुरा गर्यौं । प्रतियोगिताको सुरुमा हाम्रो फिल्डिङ अलि खराब थियो । डेभिड वार्नर ३७ वर्षको उमेरमा पनि डाइभिङ गरेको देख्न सकिन्छ । हामीले धेरै सुधार गरेका छौं ।’
