एजेन्सी । १६ औं संस्कणको इन्डियन प्रिमियर लिग (आईपीएल)को प्लेअफका खेलहरु आजदेखि सुरु हुँदैछन् । क्वालिफायर–१ मा डिफेन्डिङ च्याम्पियन गुजरात टाइटन्सको चुनौती ४ पटकको विजेता चेन्नई सुपर किंग्ससँग छ । खेल बेलुका ७ः४५ बजेदेखि चेन्नईको चेपौक स्टेडियममा हुनेछ ।
खेल जित्ने टोलीले फाइनलको टिकट पाउनेछ भने हार्ने टोली क्वालिफायर–२ मा पुग्नेछ । जहाँ उसले एलिमिनेटरको विजेतासँग खेल्नेछ । गत सिजनमा नवौं नम्बरमा रहेको चेन्नई सुपर किंग्सले यो सिजन भने उत्कृष्ट पुनरागमन गरेको थियो । पहिलो खेलमा गुजरात टाइटन्ससँग पराजित भएपछि टोलीले ८ खेल जितेको थियो ।
महेन्द्र सिंह धोनीको कप्तानीमा रहेको चेन्नईले ५ खेल गुमाएको छ भने एक खेल वर्षाका कारण अनिर्णित रह्यो । चेन्नई गुजरातपछि १७ अंकसहित अंक तालिकामा दोस्रो स्थानमा रह्यो । शीर्ष २ मा रहेर चेन्नईले अब क्वालिफायर–१ खेल्ने भएको हो ।
चेन्नईका ओपनर डेभोन कोनवे र ऋतुराज गायकवाड दुवैले लिग चरणमा ५०० भन्दा बढी रन बनाए । दुबैले ६८८ रनको साझेदारी पनि गरे, जसको मतलब सीएसकेका ओपनरहरूले बलियो सुरुवात गरे । ओपनर बाहेक मिडल अर्डरमा अजिंक्य रहाणे र शिवम दुबेले पनि यो सिजन १६० भन्दा बढीको स्ट्राइक रेटमा रन बनाए । योसँगै रविन्द्र जडेजा र महेन्द्र सिंह धोनीले अधिकांश खेलमा उत्कृष्ट प्रदर्शन गरेका थिए । जडेजाले यो सिजन ८ छक्का र धोनीले १० छक्का प्रहार गरेका छन् ।
खराब बलिङका कारण चेन्नई सुपर किंग्सले सुरुवाती खेलमा धेरै रन दियो । पावरप्ले विशेषज्ञ बलर दीपक चाहरले चोटका कारण धेरै खेल गुमाएका थिए, तर चौथो खेलपछि टोलीमा सामेल भएका श्रीलंकाका ‘जुनियर मलिंगा’ माथिशा पथिरानाले चेन्नईको बलिङ लाइनअपमा नयाँ उर्जा थपेका थिए । उनले मध्य ओभरमा रन रोक्ने र डेथमा विकेट समेत लिए । उनले १५ विकेट लिएका छन् जसमध्ये १४ विकेट १६ र २० ओभरको बीचमा लिएका छन् ।
पथिराना बाहेक तुषार देशपाण्डेले सुरुवाती खेलहरुमा विकेट त लिएका थिए तर धेरै रन पनि दिइरहेका थिए । तर पछिल्ला खेलहरूमा उनले कम रन दिए । उनी २० विकेट लिएर पर्पल क्यापको छैटौं नम्बरमा छन् । यी दुई बाहेक रविन्द्र जडेजाले १७ विकेट र दीपक चाहरले १० विकेट लिएका छन् ।
चेन्नईको स्क्वाडमा २५ खेलाडीहरू छन्, तर १८ खेलाडीहरूले मात्र खेल्ने मौका पाए । धेरै कम लागतका खेलाडीले टोलीको लागि राम्रो प्रदर्शन गरिरहे । यद्यपि, जडेजा, गायकवाड, धोनी र शिवम दुबे जस्ता करोड मूल्य भएकाहरूले पनि निराश गरेनन् ।
करोड मूल्य भएकाहरूमध्ये बेन स्टोक्स (१६.२५ करोड), अम्बाती रायुडु (६.७५ करोड)को प्रदर्शन सुस्त रह्यो । अर्कोतर्फ टिमका लागि २० लाखका तुषार देशपाण्डेले २० र मथिशा पथिरानाले १५ विकेट लिए । ५० लाखका अजिंक्य रहाणेले पनि १६९ भन्दा माथिको स्ट्राइक रेटमा २८२ रन बनाए ।
चेन्नईका कप्तान महेन्द्र सिंह धोनी ४१ वर्षका भएका छन् । धेरै क्रिकेट विज्ञहरू २०२३ उनको अन्तिम सिजन हुन सक्ने विश्वास गर्छन् । यस्तो अवस्थामा चेन्नईले आफ्नो घरेलु मैदानमा दर्शकहरूको समर्थन पाइरहेको छ, अवे खेलहरूमा पनि स्टेडियम चेन्नईका समर्थकहरूले भरिएको छ ।
कयौं पटक यस्तो भएको छ कि अन्तिम ओभरमा धोनीको ब्याटिङ हेर्न दर्शक जडेजाको विकेटको लागि हुटिङ गर्ने हदसम्म पुगेका थिए । धोनी क्रिजमा आउनेबित्तिकै फ्यानहरूले ‘धोनी…धोनी…’ नारा गुन्जाउन थाल्छन् । धोनीले पनि आफ्ना फ्यानहरूलाई निराश गरेनन् र यस सिजनमा १० छक्का प्रहार गरे ।
सम्भावित सुरुवाती–११
चेन्नई सुपर किंग्सः महेन्द्र सिंह धोनी (विकेटकिपर र कप्तान), ऋतुराज गायकवाड, डेभोन कोनवे, अजिंक्य रहाणे, शिवम दुबे, मोइन अली, रविन्द्र जडेजा, दीपक चाहर, तुषार देशपांडे, मथिशा पथिराना र महिश तीक्षाना ।
इम्प्याक्ट प्लेयरः अम्बाती रायुडु, मिचेल सान्टनर, शुभ्रांशु सेनापति, शेख राशिद र आकाश सिंह ।
