काठमाडौं । जनमत पार्टीका अध्यक्ष डा. सीके राउतले मिटरब्याजपीडितसँग भेट गरेका छन् । महोत्तरीको बर्दिबासबाट ११ दिन हिँडेर काठमाडौं आइपुगेका पीडितहरुलाई भेट्न अध्यक्ष राउत मातातीर्थमा पुगेका हुन् ।
चन्द्रनिगाहपुर, हेटौंडा, भीमफेदी र चन्द्रागिरी हुँदै पीडितहरू आइतबार मातातीर्थ आइपुगेका थिए । पीडितलाई भेटेर राउतले मिटर ब्याज पीडितहरुको पक्षमा आफ्नो पार्टीले आन्दोलन गरेको बेला सरकारसँग सहमति भएपनि सरकारले काम गर्न छाडेको बताए ।
‘सम्झौता भइसकेपछि पटक पटक किन आन्दोलन गर्नुपर्ने अवस्था आयो । हाम्रो त्यहीमा पनि असन्तुष्टि छ । सरकारले इमान्दारिता नदेखाएको भए अहिले दुख पाउनुभएको छ । यो विषयमा हामीले संसदमा आवाज उठाएको छौं । प्रधानमन्त्रीसँग आन्तरिक बैठकमा कुरा उठाएका छौं,’ अध्यक्ष राउतले भने ।
यदि सरकारले समस्या समाधान नगरे जनमत पार्टी पनि आन्दोलनमा सहभागि हुने अध्यक्ष राउतले बताए ।
