काठमाडौँ । नेपाली राष्ट्रिय क्रिकेट टिमका स्पीनर सन्दीप लामिछानेको एकदिवसीय अन्तराष्ट्रियमा बलिङको वरीयतामा सुधार भएको छ ।
अन्तर्राष्ट्रिय क्रिकेट परिषद (आईसीसी) ले अपडेट गरेको नयाँ वरीयतामा सन्दीप दुई स्थान बढेर २१ औं स्थानमा पुगेका छन् ।
बलिङ तर्फ नै नेपालका सोमपाल कामी , दीपेन्द्र सिंह ऐरी र करण केसीले शीर्ष १ सय भित्र स्थान बनाएका छन् । सोमपाल तीन स्थान बढेर ६० औं र ऐरी दुई स्थान बढेर ६३ औं स्थानमा छन् । करण भने ९६ औं स्थानमा छन् ।
यस्तै, ब्याटिङ तर्फ कप्तान रोहित पौडेल ५५ औं स्थानमा यथावत रहेका छन् । त्यसैगरी, आसिफ शेख नौ स्थानले बढेर ६२ औं स्थानमा पुगेका छन् । नेपालका अन्य ब्याटरले भने शीर्ष १ सयमा स्थान बनाउन सकेनन् ।
ब्याटिङतर्फ पाकिस्तानका कप्तान बाबर अजाम शीर्ष स्थानमा रहेका छन् भने बलिङमा भारतका तीव्र गतिका बलर मोहम्मद सिराज शीर्ष स्थानमा छन् ।
एकदिवसीय अन्तराष्ट्रिय वरीयतामा नेपाल एक स्थान सुधार गर्दै १६ औं स्थानमा उक्लिएको छ ।
