काठमाडाैँ । सुनसरीको देवानगञ्ज गाउँपालिका–३, कप्तानगञ्जमा भएको घटनापछि उत्पन्न परिस्थितिलाई मध्यनजर गर्दै जिल्लाका केही क्षेत्रमा जारी गरिएको निषेधाज्ञा र कर्फ्यू आदेश कायमै रहेको जिल्ला प्रशासन कार्यालय सुनसरीले जनाएको छ ।
प्रशासन कार्यालयले एक सूचना जारी गर्दै अवस्थाको मूल्याङ्कनका आधारमा राजमार्ग क्षेत्रमा हिजो साँझदेखि जारी गरिएको कर्फ्यू आदेश मात्र हटाइएको स्पष्ट पारेको छ । राजमार्ग क्षेत्रको कर्फ्यू हटाइएपछि अन्य क्षेत्रमा पनि आदेश हटाइएको भन्ने भ्रम सिर्जना भएको भन्दै प्रशासनले निषेधाज्ञा र कर्फ्यू जारी रहेका स्थानबारे स्पष्ट पारेको हो ।
प्रशासनका अनुसार आज बिहान ७ बजेदेखि साँझ ७ बजेसम्म हरिनगर गाउँपालिका र देवानगञ्ज गाउँपालिकाको सम्पूर्ण क्षेत्रमा निषेध आदेश जारी रहेको छ ।
त्यसैगरी, हरिनगर बजार क्षेत्र, भुटाहा बजार क्षेत्र, कप्तानगञ्ज बजार क्षेत्र, घुस्की बजार क्षेत्र र देवानगञ्ज बजार क्षेत्रलाई तोकेर अनिश्चितकालीन कर्फ्यू आदेश जारी गरिएको छ ।
हरिनगर बजार क्षेत्रको कर्फ्यू सीमा पूर्वमा नुनिया टोल, पश्चिममा पश्चिम खुनिया धार, उत्तरमा हरिनगर गाउँपालिका कार्यालय र दक्षिणमा बसन्तपुर मोडसम्म तोकिएको छ ।
भुटाहा बजार क्षेत्रमा पूर्वमा मोरीया धार खोलान, पश्चिममा इदगाहा फिल्ड, उत्तरमा सुनसरी खोला र दक्षिणमा हरिनगर गाउँपालिका कार्यालयसम्म कर्फ्यू लागू गरिएको छ ।
कप्तानगञ्ज बजार क्षेत्रमा पूर्वमा यादव टोल, पश्चिममा पाँचौ सिमल माध्यमिक विद्यालय, उत्तरमा कृष्ण माध्यमिक विद्यालय र दक्षिणमा नेपाल–भारत सीमा क्षेत्रसम्म कर्फ्यू आदेश जारी छ ।
त्यस्तै, घुस्की बजार क्षेत्रमा पूर्वमा कासमिया मदरसा, पश्चिममा प्रहरी चौकी घुस्की, उत्तरमा इशा हार्डवेयर र दक्षिणमा हिलाल पब्लिक स्कुलसम्म कर्फ्यू लागू गरिएको छ ।
देवानगञ्ज बजार क्षेत्रमा भने पूर्वमा विराटनगर जाने बाटोको मुसहर टोल, पश्चिममा मोरीया खोला र उत्तरमा चिउरा मिलसम्मको क्षेत्रमा अनिश्चितकालीन कर्फ्यू आदेश जारी रहेको प्रशासनले जनाएको छ ।
जिल्ला प्रशासन कार्यालय सुनसरीले परिस्थितिको संवेदनशीलतालाई ध्यानमा राख्दै सर्वसाधारणलाई प्रशासनद्वारा जारी आदेशको पालना गर्न तथा शान्ति र सद्भाव कायम राख्न आग्रह गरेको छ ।
