काठमाडौं । नेकपा एमालेको कार्यदलको बैठक सकिएलगत्तै सदस्यहरु आपसी छलफलमा जुटेका छन् ।
माधव नेपाल पक्षका कार्यदल सदस्यहरु सिंहदरबारस्थित अर्थमन्त्रालयकै एउटा कोठामा छलफलमा जुटेका छन् भने ओली पक्षका कार्यदल सदस्यहरु प्रधानमन्त्री कार्यालयतर्फ भेला भएका छन् ।
पार्टी एकताको प्रयासका लागि कार्यदलको बैठक दुईदिनदेखि लगातार बस्दै आएको छ । विहीबार पनि बिहान ११ बजेपछि कार्यदलको बैठक बसेको थियो । तर, केही समय आन्तरिक गृहकार्य गर्ने भन्दै बैठक साँझ बस्नेगरी स्थगित गरिएको छ ।
एमालेका दोस्रो तहका नेताहरु आजै सहमति जुटाउने र ओली–माधवको संयुक्त हस्ताक्षरमा वक्तव्य जारी गर्ने प्रयासमा सक्रिय बनेका छन् ।
यही क्रममा बुधबार राति मेरियट होटलमा अध्यक्ष ओली र वरिष्ठ नेता माधवकुमार नेपालवीच वार्ता भएको थियो । वार्तामा दुबै नेताहरु आ–आफ्नै अडानमा रहेकाले सहमति जुट्न सकेको थिएन ।
पार्टीमा विवाद समाधानका लागि गठित एमाले कार्यदलमा केपी ओली पक्षबाट सुवासचन्द्र नेम्वाङ, विष्णु पौडेल, शंकर पोखरेल, प्रदीप ज्ञवाली र विष्णु रिमाल सहभागी छन् । त्यस्तै, माधव समूहबाट भीम रावल, रघुजी पन्त, घनश्याम भुसाल, सुरेन्द्र पाण्डे र गोकर्ण विष्ट रहेका छन् ।
