काठमाडौं । नेकपा (एमाले) का अध्यक्ष केपी शर्मा ओलीले अब सरकार गठन र विघटनको खेलमा लाग्न नहुने बताउनु भएको छ ।
प्रतिनिधिसभाको पहिलो दिनको बैठकलाई सम्बोधन गर्दै एमाले अध्यक्ष ओलीले सरकार गठन हुन नपाउँदै ढलाउने खेलतिर लाग्न थालेको आशंका गर्नुभयो । उहाँले भन्नुभयाे जनता र देशका लागि कहिले काम गर्ने ? उहाँले भन्नुभयो ‘सांसद र नेताहरूको सम्पूर्ण समय गोटी चालाचालमा बित्यो भने देशका लागि कहिले काम गर्ने ? सरकार बन्न पाएको छैन बिगार्ने खेलतिर लाग्यौं भने समयको बर्बादी हुन्छ ।’
उहाँले मुलुकमा राजनीतिक स्थायित्वका लागि काम गर्नुपर्ने बताउनु भयो । उहाँले नयाँ राजनीतिक दलहरूको उदयले पनि जनताले स्थिरता र विकास चाहेको देखिएको बताउनु भयो । जनताले सरकारमा परिवर्तन खोजेकाले संसद्मा नयाँ दल र नयाँ सांसदहरूको उपस्थिति रहेको उहाँले बताउनु भयो ।
ओलीले प्रधानमन्त्री प्रचण्डलाई बधाई दिदै चुनौतीलाई पनि स्मरण गराउनु भएको छ । उहाँले भन्नुभयो आज पनि उहाँलाई बधाई भन्न चाहन्छु । तर चुनौती छन् भन्ने कुरा पनि स्मरण गराउन पनि चाहन्छु ।’
ओलीले नयाँ गठबन्धन सरकार समग्रतामा राष्ट्रियता, मुलुको सार्वभौमसत्ता, स्वाधीनता र भौगोलिक अखण्डताको पक्षमा उभिने बताउनुभयो । सरकारलाई बधाई दिँदै उहाँले सुशासन, भ्रष्टाचार नियन्त्रण, सामाजिक विभेद अन्त्य गर्नुपर्ने जस्ता विषयमा सरकारले ध्यान दिने अपेक्षा गर्नुभयो ।
अहिले अर्थतन्त्र गम्भीर संकटमा रहेको उल्लेख गर्दै उहाँले यस्तो अवस्थामा सबै राजनीतिक पार्टीले लोकतान्त्रिक मूल्य मान्यतामा चल्नुपर्ने बताउनुभयो ।
अध्यक्ष ओलीले अब सरकारले न्यूनतम साझा कार्यक्रम ल्याउन लागेको जानकारी दिँदै सोही कार्यक्रमअनुसार सरकार अघि बढ्ने स्पष्ट गर्नुभयो । साझा कार्यक्रमले लोकतन्त्रको रक्षा, सम्वर्द्धन र सुदृढीकरण गर्ने र संविधान रक्षाका लागि काम गर्ने बताउनुभयो ।
