काठमाडौं । दोस्रो एकदिवसीय खेलमा नेपाल पपुवा न्युगिनी (पीएनजी)सँग ३ विकेटले पराजित भएको छ ।योसँगै दुई ओडिआई खेलको सिरिज भ्रमण टोली पपुवा न्युगिनीले २–० ले जित्दै क्लिनस्विप गरेको छ ।
२ सय ७९ रनको विजयी लक्ष्य पछ्याएको पीएनजीले ४८.४ ओभरमा ७ विकेट गुमाउँदै पूरा गर्यो ।
पीएनजीका लागि लेगा सिएकाले सर्वाधिक ९० रनको योगदान दिए । १०२ बल खेलेका उनले १२ चौका र १ छक्का प्रहार गरे । यसैगरी, चाल्र्स अमिनीले ३० बलमा ३५, सेसे बाउले ६९ बलमा ३८, रिले हेकुरले ४५ बलमा ४८, हिरी हिरीले २२ बलमा १३, नोर्मान भनुआले ५ बलमा ११ रन जोडे भने चाड सोपर १६ रनमा अविजित रहे ।
नेपालका लागि सोमपाल कामीले ३ विकेट लिए भने पवन शर्राफले २ तथा सन्दीप लामिछाने र आरिफ शेखले १–१ विकेट लिए ।
त्यसअघि कीर्तिपुरस्थित टियु मैदानमा टस जितेर पहिला ब्याटिङमा उत्रिएको नेपालले ५० ओभरमा ८ विकेटको क्षतिमा २७८ रन जोड्यो ।
नेपालका लागि दिपेन्द्र सिंह ऐरीले शतक प्रहार गरे । ऐरीले १ सय ३६ बलमा ६ चौका प्रहार गर्दै शतक पूरा गरे । उनले १४० बलमा ७ चौका प्रहार गर्दै १०५ रनको योगदानी दिए ।
योसँगै उनी एकदिवसीय अन्तराष्ट्रिय क्रिकेटमा शतक प्रहार गर्ने तेस्रो नेपाली खेलाडी बनेका छन् ।
यसअघि नेपालका पारस खड्का र रोहित पौडेलले शतक प्रहार गरेका थिए ।
यसैगरी, देव खनालले ८६ बलमा ७२, रोहित पौडेलले ३६ बलमा ३५, भीम सार्कीले १९ बलमा २६ रनको योगदानी दिए । अन्तीम ओभरको स्थितीमा सन्दीप लामिछानेले ९ बलमा २४ रन जोड्दै नेपालको लक्ष्यलाई बढाएका थिए । उनले २ चौका र १ छक्का प्रहार गरे ।
पीएनजीका लागि अली नाओले ३ विकेट लिए भने नोर्मान भनुआले २ तथा चाड सोपर र चाल्र्स अमिनीले एक–एक विकेट लिए । दुई एकदिवसीय खेलको पहिलो खेलमा नेपाल ६ रनले पराजित भएको थियो । अब नेपाल, मलेसिया र पपुवा न्युगिनीबीच त्रिदेशीय टि२० आई सिरिज हुनेछ । नेपालले सोमबार पपुवा न्युगिनीको सामना गर्नेछ ।
