काठमाडौं । नेपाली कम्युनिष्ट पार्टीका सांसद प्रेमबहादुर वयकले खाना पकाउने ग्यासको अभावका कारण नागरिकले भोग्नुपरेको समस्याप्रति सरकारको गम्भीर ध्यानाकर्षण गराउनुभएको छ ।
बिहीबार बसेको प्रतिनिधिसभाको बैठकमा बोल्दै सांसद वयकले ग्यास अभावका कारण सुत्केरी श्रीमतीलाई खाना पकाएर खुवाउन नसकेपछि एक युवाले आत्महत्याको प्रयास गरेको घटनासमेत उल्लेख गर्नुभयो । उहाँले यस्तो अवस्था सिर्जना हुनुमा सम्बन्धित मन्त्री र सरकार नैतिक रूपमा जिम्मेवार हुनुपर्ने बताउनुभयो ।
काठमाडौंलगायत विभिन्न स्थानमा कोठाभाडामा बसेका विद्यार्थी तथा सर्वसाधारणले खाना पकाउने ग्यास नपाएपछि सहयोगका लागि सांसदहरूलाई फोन गर्नुपर्ने अवस्था सिर्जना भएको उहाँको भनाइ थियो । आपूर्ति व्यवस्थापनमा देखिएको कमजोरी र लापरवाहीप्रति प्रश्न उठाउँदै उहाँले तत्काल ग्यास आपूर्तिको समस्या समाधान गर्न सरकारसँग माग गर्नुभयो ।
‘पानीमा भिज्दै सिलिन्डर बोकेर विद्यार्थी र सर्वसाधारण नागरिकहरू भोकभोकै लाइनमा बस्नुपर्ने अवस्था कहिलेसम्म रहने हो ?’ उहाँले प्रश्न गर्नुभयो ।
सांसद वयकले ग्यास अभावका कारण नागरिकमा निराशा बढ्दै गएको बताउँदै जेन्जी आन्दोलनको आधारमा बनेको वर्तमान सरकारप्रति समेत जनताको असन्तुष्टि बढ्न थालेको दाबी गर्नुभयो । हिजो ‘बोल्न देऊ सरकार’ भन्दै आन्दोलन गर्नेहरू नै अहिले सरकारको नेतृत्वमा पुगेपछि प्रश्न उठाउनेहरूप्रति खबरदारीको भाषा प्रयोग गर्न थालेको उहाँको आरोप थियो ।
उहाँले संविधानले सुनिश्चित गरेको वाक् स्वतन्त्रताको अधिकार कुनै व्यक्तिविशेषलाई हेरेर नभई सबै नागरिकका लागि समान रूपमा लागू हुने बताउनुभयो । जनताका अगाडि झुटा अभिव्यक्ति र धम्की टिक्न नसक्ने उहाँको भनाइ थियो ।
यसैबीच सांसद वयकले रसुवामा भोटेकोशी नदीमा आएको विनाशकारी बाढीका क्रममा कैलालीका विभिन्न स्थानका ३४ जना मैलुङ खोला जलविद्युत् आयोजनाको २१६ नम्बर ड्यामबाट बेपत्ता भएको उल्लेख गर्नुभयो । उहाँले बेपत्ता नागरिकको तत्काल खोजी तथा उद्धार कार्यलाई तीव्र बनाउन सरकारसँग माग गर्नुभयो ।
