बुधबार काठमाडौंमा आयोजित एक कार्यक्रममा बोल्दै राणाले पार्टीलाई थप गतिशील बनाउन आफ्नो नेतृत्व आवश्यक रहेको दाबी गर्नुभयो । उहाँले आफू व्यक्तिगत स्वार्थभन्दा माथि उठेर सिंगो तरुण पंक्तिको प्रतिनिधित्व गर्दै महामन्त्री पदको दौडमा रहेको बताउनुभयो ।
राणाले आफ्नो विगतको कार्यक्षमता र अनुभवलाई उम्मेदवारीको मुख्य आधार बनाउनुभएको छ । तरुण दलको नेतृत्व गर्दा ललितपुरमा नेपाली काँग्रेसले हासिल गरेको चुनावी सफलतालाई स्मरण गर्दै उहाँले आफ्नो राजनीतिक छवि स्वच्छ र प्रभावकारी रहेको दाबी गर्नुभयो ।
पार्टीभित्र देखिएको गुटगत असन्तुष्टि र असहमतिलाई सम्बोधन गर्दै सबै पक्षलाई मूलधारमा समेटेर अघि बढ्न आफू सक्षम रहेको उहाँको भनाइ छ । जिल्ला तथा प्रदेश तहका समर्थक र तरुण दलका साथीहरूलाई आफ्नो उम्मेदवारी सफल बनाउन सक्रियतापूर्वक लाग्न उहाँले आग्रह गर्नुभयो ।
उहाँले भन्नुभयो, “म केवल उदयशम्शेरको रूपमा उठेको होइन, तरुण दलको पूर्वअध्यक्ष र युवाहरूको प्रतिनिधिको हैसियतले उम्मेदवारी दिएको हुँ । तरुण साथीहरूको साथ र सहयोग मेरो मुख्य शक्ति हो । मैले तरुण दलको अध्यक्ष हुँदा ललितपुरमा काँग्रेसलाई क्लिन स्विप गराएको इतिहास छ । त्यही अनुभव र आत्मविश्वासका साथ म महामन्त्रीको जिम्मेवारी सम्हाल्न तयार छु ।”
राणाले पार्टीभित्र युवाहरूको ऊर्जालाई संगठित गर्दै वैचारिक तथा सांगठनिक सुधार अघि बढाउन आफू सक्षम रहेको पनि बताउनुभयो।
