काठमाडौं । राष्ट्रिय प्रजातन्त्र पार्टी (राप्रपा)का संसदीय दलका नेता ज्ञानबहादुर शाहीले रसुवाको भोटेकोशी बाढीपछि जलविद्युत् आयोजनाका सुरुङमा फसेका नागरिकको उद्धारमा सरकारले गम्भीरता नदेखाएको आरोप लगाउनुभएको छ ।
प्रतिनिधि सभाको बिहीवारको बैठकमा बोल्दै शाहीले बाढीले पुरिएका सुरुङमा तत्काल प्रवेश गरी फसेका नागरिकको खोज तथा उद्धार गर्न सरकारसँग माग गर्नुभयो ।
उहाँले बाढी प्रभावित पाँचवटा सुरुङमा अझै उद्धारकर्मी नपुगेको दाबी गर्दै नागरिकको जीवनरक्षा सरकारको पहिलो प्राथमिकता हुनुपर्ने बताउनुभयो ।
शाहीले प्रधानमन्त्रीले जलविद्युत् विज्ञहरूसँग समयमै संवाद नगरेको भन्दै आपत्ति जनाउनुभयो । उहाँले जलविद्युत् विज्ञ कुलमान घिसिङजस्ता व्यक्तिसँग आवश्यक परामर्श गरेर उद्धार कार्य अघि बढाउनुपर्नेमा सरकारले त्यसतर्फ पर्याप्त ध्यान नदिएको आरोप लगाउनुभयो ।
प्रधानमन्त्रीले बुधबारको प्रतिनिधि सभा बैठकमा सुरुङमा पसेको लेदो खन्ने मेसिन संसारमै नभएको अभिव्यक्ति दिएको भन्दै शाहीले त्यसप्रति समेत आपत्ति जनाउनुभयो । उद्धारका लागि आवश्यक बजेट परिचालन गर्ने अधिकार सरकारसँगै रहेको उल्लेख गर्दै उहाँले स्रोत र साधनको अभाव देखाएर उद्धारमा ढिलाइ गर्न नहुने बताउनुभयो ।
शाहीले सुरुङमा फसेका व्यक्तिका परिवारले आफ्ना आफन्तको खोजी तथा उद्धारको माग गर्दा सामाजिक सञ्जालमा सत्तारुढ दल राष्ट्रिय स्वतन्त्र पार्टी (रास्वपा)का नेता–कार्यकर्ताले व्यक्तिगत गालीगलौज र दुर्व्यवहार गरेको आरोपसमेत लगाउनुभयो ।
उहाँले भन्नुभयो, ‘पाँचवटा टनेलमा केही काम नै भएको छैन । हामीले माग्ने सरकारसँगै हो । हिजो नख्खुमा बग्दै गएका नागरिकलाई उद्धार गरिदिनुस् भन्दा तत्कालीन प्रधानमन्त्री केपी शर्मा ओलीका समर्थकले आक्रमण गरे । रातो लुगा लगाएका एमालेका कार्यकर्ताहरू त्यसबेला हामीलाई कुट्न आउँथे । अहिले एकजना महिलाले टनेलमा फसेका श्रीमान्को खोजी गरिदिनुस् भन्दा रास्वपाका नीलो साइबर स्यालहरू उनीमाथि दुर्व्यवहारसहित गालीगलौज र आक्रमण गरिरहेका छन् ।’
शाहीले राजनीतिक आरोप–प्रत्यारोपभन्दा माथि उठेर बाढी प्रभावित नागरिकको जीवनरक्षामा सम्पूर्ण राज्य संयन्त्र परिचालन गर्न सरकारसँग आग्रह गर्नुभयो । उहाँले सुरुङमा फसेका नागरिकको तत्काल खोजी तथा उद्धारका लागि आवश्यक सबै उपाय अवलम्बन गर्नुपर्नेमा जोड दिनुभयो ।
