काठमाडौं । नेपाली काँग्रेसका सभापति गगनकुमार थापाले बाढीपहिरोका कारण घरबारविहीन भएका नागरिकहरूको अवस्था अत्यन्तै दयनीय रहेको भन्दै उनीहरूको पुनःस्थापनाका लागि विशेष पहल गर्नुपर्ने बताउनुभएको छ ।
बिहीवार रसुवा बाढीपीडितका लागि नेपाली काँग्रेसको विपद् व्यवस्थापन कोषमा काठमाडौं निर्वाचन क्षेत्र नम्बर ४ अन्तर्गतका १२ वटा इकाइबाट संकलित रकम हस्तान्तरण कार्यक्रममा उहाँले यस्तो बताउनुभएको हो ।
विपद्पछिको अवस्थाबारे चर्चा गर्दै सभापति थापाले बाढीबाट भएको विनाश भूकम्पको तुलनामा झनै भयावह रहेको बताउनुभयो । बाढीले घर, जायजेथा र जीविकोपार्जनका आधारसमेत बगाएपछि पीडितहरू विद्यालय तथा सार्वजनिक भवनमा आश्रय लिन बाध्य भएको उहाँले उल्लेख गर्नुभयो ।
उहाँले बाढीबाट बाटो, पुल र विद्यालयजस्ता भौतिक पूर्वाधारमा क्षति पुगेको भए पनि नागरिकको व्यक्तिगत सम्पत्तिमा भएको क्षति अझ अपूरणीय रहेको बताउनुभयो । विशेषगरी खोला किनारमा जीवनभरको कमाइ खर्चिएर घडेरी किनेर बसोबास गरेका साना बजार तथा बस्तीहरू पूर्ण रूपमा सखाप भएको उहाँको भनाइ छ ।
सभापति थापाले भन्नुभयो, ‘भूकम्पले घर भत्काए पनि जमिन बाँकी रहन्थ्यो, तर बाढीले त घरसँगै आश्रय दिने जमिन र गरिखाने खेतबारीसमेत बाँकी नराखी बगाएर लैजाने रहेछ । कतिपयको ८–९ रोपनी खेत त कतिपयको उठिबास हुने गरी घरजमिन सबै बाढीले बगाएको छ । यस्तो अवस्थामा पीडितहरू पूर्ण रूपमा रित्तिएका छन् ।’
भूकम्पका बेला घर निर्माणका लागि सहुलियत ऋणलगायतका व्यवस्था गर्न सकिने अवस्था रहे पनि अहिले बाढीपीडितका हकमा घर बनाउने जमिनसमेत नरहेकाले पुनःस्थापनाको चुनौती थप जटिल बनेको उहाँले बताउनुभयो ।
बाढीपीडितको तत्कालीन राहतसँगै दीर्घकालीन पुनःस्थापनालाई प्राथमिकतामा राख्नुपर्नेमा जोड दिँदै थापाले प्रभावित नागरिकलाई पुनः सामान्य जीवनमा फर्काउन विशेष योजना र पहल आवश्यक रहेको बताउनुभयो ।
काठमाडौं निर्वाचन क्षेत्र नम्बर ४ का १२ वटा इकाइबाट संकलन गरिएको रकम रसुवा लगायतका बाढीपहिरो प्रभावितको राहत तथा सहयोगका लागि नेपाली काँग्रेसको केन्द्रीय कोषमार्फत परिचालन गरिने बताइएको छ ।
