काठमाडौं । नेकपा (एमाले)का सांसद प्राध्यापक डा. पुष्पराज कँडेलले १० भदौमा आएको भीषण बाढीबाट क्षतिग्रस्त सडक तथा पुलको पुनर्निर्माणलाई प्राथमिकता दिन सरकारसँग माग गर्नुभएको छ ।
प्रतिनिधि सभाको बिहीवारको बैठकमा बोल्दै सांसद कँडेलले बाढीका कारण धादिङ सदरमुकाम, नुवाकोट र रसुवाका विभिन्न क्षेत्रमा यातायात सम्पर्क विच्छेद हुँदा राहत वितरणमा समेत समस्या भएको बताउनुभयो ।
उहाँले धादिङको कृष्णभीर र परेवाभीरमा गएको पहिरोका कारण अवरुद्ध पृथ्वीराजमार्ग तत्काल सञ्चालनमा ल्याउन तथा आवश्यक स्थानमा वैकल्पिक मार्ग निर्माण गर्न सरकारको ध्यानाकर्षण गराउनुभयो ।
सांसद कँडेलले बाढी तथा पहिरोका कारण मुलुकको कुल गार्हस्थ उत्पादन (जीडीपी) मा करिब १० प्रतिशतसम्म ह्रास आउन सक्ने बताउनुभयो । सरकारले चालु आर्थिक वर्षमा लिएको ७ प्रतिशत आर्थिक वृद्धिको लक्ष्य हासिल गर्नसमेत बाढी ठूलो चुनौती बनेको उहाँको भनाइ छ ।
उहाँले भन्नुभयो, ‘हामीले भोगेको यो दुर्घटनाले कुल गार्हस्थ उत्पादनको १० प्रतिशत जति नोक्सान हुने स्थिति छ । सरकारले ७ प्रतिशतको आर्थिक वृद्धि दरको लक्ष्य राखेको थियो । त्यो प्राप्त हुने सम्भावना अत्यन्त न्यून हुँदै गएको स्थिति छ ।’
बाढीका कारण धादिङको तल्लो बेनीघाट, रोराङ र बुढीगण्डकी क्षेत्रमा ठूलो क्षति भएको उहाँले बताउनुभयो । बुढीगण्डकी र अन्य क्षेत्रबाट आएको बाढीका कारण कृष्णभीरमा पहिरो खसेको तथा थुप्रै पुल बगाएको उहाँले उल्लेख गर्नुभयो ।
त्यस्तै, फुर्केखोलानजिकैको परेवाभीर क्षेत्रमा समेत सडक कटान भएको भन्दै उहाँले दुई स्थानमा त्रिशूली नदीले सडक नै बगाएर लगेका कारण धादिङ सदरमुकामको यातायात सम्पर्क प्रभावित भएको बताउनुभयो ।
पुलहरू बगाउँदा नुवाकोटको ठूलो भूभाग र रसुवाका विभिन्न क्षेत्रसमेत सडक सञ्जालबाट प्रभावित भएको उहाँको भनाइ छ ।
सांसद कँडेलले विपद्पछि खोज, उद्धार तथा राहत वितरणलाई थप प्रभावकारी बनाउन पनि सरकारको ध्यानाकर्षण गराउनुभयो ।
यसैगरी, बुढीगण्डकी आयोजना लामो समयदेखि अघि बढ्न नसकेको भन्दै उहाँले आयोजनाको विस्तृत परियोजना प्रतिवेदन (डीपीआर) तथा डिजाइन पुनरावलोकन गरी काम अघि बढाउनुपर्नेमा जोड दिनुभयो । बुढीगण्डकी आयोजना अघि नबढ्दा अन्य विकास निर्माणका कामसमेत प्रभावित भइरहेको उहाँले बताउनुभयो ।
