काठमाडौं । निजी तथा आवासीय विद्यालय अर्गनाइजेसन नेपाल (प्याब्सन) ले सुनसरीको देवानगञ्जबाट सुरु भएको विवादका कारण मधेस प्रदेशका विभिन्न क्षेत्रमा उत्पन्न तनावप्रति गहिरो चिन्ता व्यक्त गर्दै सामाजिक सद्भाव, धार्मिक सहिष्णुता र राष्ट्रिय एकता कायम राख्न अपिल गरेको छ।
प्याब्सन केन्द्रीय कार्यसमितिले विज्ञप्ति जारी गर्दै घटनाका क्रममा ज्यान गुमाएका नागरिकहरूप्रति श्रद्धाञ्जली अर्पण गर्दै शोकसन्तप्त परिवारजनमा समवेदना व्यक्त गरेको छ। साथै, घाइतेहरूको शीघ्र स्वास्थ्यलाभको कामना गरेको छ।
नेपाल बहुजातीय, बहुभाषिक, बहुधार्मिक तथा बहुसांस्कृतिक विशेषतायुक्त राष्ट्र भएकाले विविधताबीचको एकता, पारस्परिक सम्मान, सामाजिक सद्भाव र सहअस्तित्व नै राष्ट्रिय शक्तिको आधार भएको प्याब्सनले जनाएको छ।
प्याब्सनले संवेदनशील परिस्थितिमा सबै नागरिकलाई शान्त, संयमित र जिम्मेवार रहन आग्रह गर्दै अपुष्ट सूचना, अफवाह तथा उत्तेजनात्मक अभिव्यक्तिबाट टाढा रहन अनुरोध गरेको छ। समस्याको समाधान आपसी संवाद, सहिष्णुता र समझदारीमार्फत खोज्न पनि उसले अपिल गरेको छ।
त्यस्तै, घटनाको निष्पक्ष, पारदर्शी र विश्वसनीय छानबिन गरी सत्यतथ्य सार्वजनिक गर्न तथा दोषीमाथि कानुनबमोजिम कारबाही गर्न प्याब्सनले नेपाल सरकार, राजनीतिक दल र नागरिक समाजसँग आग्रह गरेको छ। प्रभावित क्षेत्रमा शान्ति, सुरक्षा र सामाजिक सद्भाव पुनःस्थापित गर्न पनि उसले सम्बन्धित सबै पक्षको ध्यानाकर्षण गराएको छ।
राष्ट्रको शान्ति, स्थिरता, सामाजिक सद्भाव र राष्ट्रिय एकताको संरक्षण सबैको साझा दायित्व भएको उल्लेख गर्दै प्याब्सनले आफ्ना मातहतका सम्पूर्ण समितिहरूलाई स्थानीयस्तरमा शान्ति र सद्भाव कायम गर्न महत्वपूर्ण भूमिका निर्वाह गर्न आग्रह गरेको छ।
