काठमाडौं । ‘लकडाउनले मिति नै बिर्सिएँ सर ! त्यसैले बिलमा नलेखेको ।’ काठमाडौं महानगरपालिका वडा २६ गोङ्गवु टाउन प्लानिङ्मा खाद्य व्यापार गर्ने कृष्णमान श्रेष्ठले सामान बेचेको बिलमा मिति उल्लेख नगर्नुको कारण यसरी बताए । उनले खरिद बिलमा केरमेट गरेका थिए । यसको सोझो कारण बताउँदै उनले थपे — ‘बिल अंग्रेजीमा पठाउँछन् । आफूलाई अंग्रेजी आउँदैन । त्यही भएर नेपालीमा लेख्न लगाएको ।’
उनको पसलमा बेच्न राखिएका चामलको बोरामा राखिएको ट््यागका अक्षर केरमेट भएकोमा उनले अनभिज्ञता जनाए । शनिवार बिहान महानगरको उपभोक्ता हित संरक्षण समितिको अनुगमनका क्रममा व्यापारी श्रेष्ठले यस्तो बताएका हुन् ।
उनको पसल छेवैमा रहेको बिग मार्टमा प्याकेजिङ् अनुमति पत्र नपाएका सामानहरु बिक्रीमा राखिएका थिए । चिप्सलगायत एअर टाइट प्याकेजिङ् खाद्य बस्तुका केही प्याकेजहरुमा हावा फुस्किएको थियो ।
यता मरासिनी स्टोरमा म्याद गुज्रेका खाद्य तथा तेलजन्य बस्तु भेटिए । स्टोरकी सञ्चालक प्रमिला मरासिनी शर्मा भन्दैहुनुहुन्थ्यो — लक डाउनले केही मिलाउन पाएको छैन ।
आज काम गर्ने मान्छे बोलाएकी छु । उनको पसलबाट उपभोग्य म्याद नाघेका आमा व्राण्डका आधा लिटरका १७ प्याकेट तेल, कोसेली ब्राण्डको १ लिटर तेल, ३० के. जी. मैदा, २ के. जी. चिनी बरामद गरेर नष्ट गरिएको छ ।
अनुगमन टोली मरासिनी स्टोरमा भएकै बेला मिलन श्रेष्ठले सुनकोशी व्राण्डको १ कार्टुन सुकेको चाउचाउ लिएर आउनुभयो । तर बिल दिनुभएन । सोधखोज गर्दा उहाँ आलो चाउमिन बनाएर वितरण गर्ने गरेको थाहा भयो । छेवैमा उहाँले करीब ४० प्याकेज आलो चाउमिन मोटरसाइकलमा राख्नुभएको थियो । ती सामानमा उत्पादक मिति, उपभोग्य मिति, मूल्य केही पनि उल्लेख थिएन । यो देखेर अनुगमन समितिका सदस्यले सोधे — यो चाउमिन खान मिल्छ भनेर कसरी थाहा पाउनु । यो प्रश्न सुनेर श्रेष्ठले उत्तर दिनुभयो — छाम्नु त सर, तातै छ । थाहा भइहाल्छ नि ।
अनुगमन समितिले यस्तो व्यापार गर्न नहुने भनेर श्रेष्ठलाई सचेत गराएर छाड््यो । अनुगमन समितिले आज गोङ्गबु आवास क्षेत्रमा भएका खुद्रा पसलहरुको अनुगमन गरेर सुधारका लागि सचेत गराएर छाडेको छ ।
