काठमाडौं । साहित्यकार तथा कवि गंङ्गानाथ कोइरालाको कवितासंग्रह “आशाको किरण” लोकार्पण गरिएको छ । देउखुरी साहित्य तथा सांस्कृतिक मञ्चले शुक्रबार एक कार्यक्रमको आयोजना गरी कविता संग्रहको लोकार्षण गरेको हो । कार्यक्रमका प्रमुख अतिथि लमही नगरपालिकाका मेयर कुलवहादुर केसी र विशिष्ट अतिथि राप्ती साहित्य परिषदका केन्द्रिय अध्यक्ष पुरुषोत्तम खनालले संयुक्त रुपमा पुस्तकको लोकार्पण गर्नुभएको हो । लोकार्पण कार्यक्रममा बोल्दै मञ्चका अध्यक्ष हरि पोख्रेलले बि.सं. २०६१ देखि २०७१ साल बिचका घटना क्रमलाई कवि कोइरालाले सरल तर मार्मिक रुपमा प्रस्तुत गर्नुभएकाले कविता पढ्दा आफु त्यहि समयमा पुगेको अनुभुति ब्यक्त गर्नुभयो ।
समिक्षक हरेकृष्ण ज्ञवालीले आशाको किरण कविता संग्रह नेपाली साहित्यले गर्व गर्न लायक कृति जन्मिएको बताउनुभयो । नगर प्रमुख केसीले नेपालमा भएको राजनीतिक उपलब्धिहरुमा साहित्य जगतको ठुलो योगदान रहेको उल्लेख गर्नुभयो । त्यस्तै राप्ती साहित्य परिषदका केन्द्रिय अध्यक्ष पुरुषोत्तम खनानले साहित्यकार यहाँ वहाँको नभई सिंगो राष्ट्रको निधी हुने बताउनुभयो । कार्यक्रममा बोल्दै कवि कोइरालाले दाङ्ग देउखुरीले आफुलाई पाल्पाले जस्तै मायाँ र स्नेह दिएको बताउँदै यो भन्दा ठुलो प्रोत्साहन साहित्यकर्मीलाई केहि नहुने धारणा व्यक्त गर्नुभयो ।
कार्यक्रममा बुद्धिजिवी जागेश्वर शर्मा घिमिरे, थारु भाषा तथा साहित्य संरक्षण मञ्चका छविलाल कोपिला, अवधी विकास परिषदका अध्यक्ष जगतराम यादव, राप्ती साहित्य परिषदका अध्यक्ष कमलमणि देवकोटा, लमही नगरपालिका वडा नम्बर ५ का अध्यक्ष वीमबहादुर केसी, शिक्षक दामोदर पाण्डे, सामुदायिक रेडियो प्रसारक संघ लुम्बिनी प्रदेशका अध्यक्ष केपी घिमिरे, नेपाल पत्रकार महासंघका जिल्ला उपाध्यक्ष लीला शाह, अध्येयता उदयराज आले, साहित्यकार तथा नागरिक समाज दाङ्गका उपसंयोजक नीमबहादुर थापा लगायतका वक्ताहरुले शुभकामना मन्तब्य राख्नुभएको थियो ।
कार्यक्रममा विभिन्न साहित्यकारहरुले रचना बाचन गर्नुभएको थियो । कविता संग्रह “आशाको किरणमा” ५० कविता र केहि समस्या पुर्ती रहेका छन् ।
पोखराथोक साहित्य संगम पाल्पाका संस्थापक अध्यक्षसमेत रहनुभएका कोइरालाको यो दोस्रो कृति हो । उहाँको पहिलो कृति “हिमाल र छहरा” कविता संग्रह प्रकाशित छ ।
