एजेन्सी । इन्डियन प्रिमियर लिग (आईपीएल)को १७ औं संस्करण भोलि शुक्रबारबाट सुरु हुँदैछ । पहिलो खेल हुनुअघि कार्यक्रममा ओपनिङ सेरेमोनीले मैदानमा दर्शकहरुको उत्साह बढाउन मद्दत गर्नेछ ।
पहिलो खेल रोयल च्यालेन्जर्स बैंग्लोर र चेन्नई सुपर किंग्स बीच हुनेछ । यो खेल चेन्नईको एमए चिदम्बरम स्टेडियममा हुनेछ । उद्घाटन समारोहमा धेरै फिल्मी कलाकारहरुको उपस्थिति रहनेछ । यो समारोह ३० मिनेटसम्म चल्ने बताइएको छ ।
आईपीएलको उद्घाटन समारोहमा अक्षय कुमार र टाइगर श्राफ पनि उपस्थित हुनेछन् । यी दुई कलाकारको नयाँ फिल्म ‘बडे मियाँ छोटे मियाँ’ अप्रिल १० मा रिलिज हुँदैछ । अक्षय र टाइगर आफ्नो फिल्मको प्रमोशनका लागि सँगै प्रस्तुति दिनेछन् ।
उनी बाहेक भारतका चर्चित संगीतकार एआर रहमान र सोनु निगम पनि उद्घाटन समारोहमा सहभागी हुने भएका छन् । उनको सांगीतिक प्रदर्शनले निस्सन्देह एमए चिदम्बरम स्टेडियममा आकर्षण थप्ने छ । मैदानमा रंगीन बत्ती जडान गरिएको स्टेडियमको तस्विर सामाजिक सञ्जालमा आइरहेका छन् ।
स्टेडियममा उपस्थित हजारौं दर्शकको लागि यी सबै फिल्म स्टारहरू प्रदर्शन गर्न पूर्ण रूपमा तयार हुनेछन् ।
आईपीएलको दिनको खेल सुरु हुने समय दिउँसो ३ः४५ तोकिएको भए पनि साँझको खेल ७ः४५ बजे सुरु हुनेछ । पहिलो दिन उद्घाटन समारोह पनि हुने भएकोले चेन्नई र आरसीबीबीचको खेल बेलुका ८ः१५ बजे सुरु हुनेछ ।
