काठमाडौं । नेपालले अतिकम विकसित राष्ट्रको ‘कोअर्डिनेसन व्युरो’को जिम्मेवारी पाएको छ । दोहामा आयोजित अतिकम विकसित राष्ट्रहरुको पाँचौं अन्तर्राष्ट्रिय सम्मेलनले नेपाललाई उक्त जिम्मेवारी दिएको हो ।
संयुक्त राष्ट्रसंघमा एक महिनापछि हुने एक समारोहमा नेपाललाई उक्त जिम्मेवारी औपचारिकरुपमा हस्तान्तरण गरिनेछ ।
एलसीडीको अन्तर्राष्ट्रिय सम्मेलनमा नेपालले सन् २०२६ सम्म विकासशील राष्ट्रमा प्रवेश गरिसक्ने प्रतिवद्धता जनाएको छ । सम्मेलनमा नेपालले विकासशील राष्ट्रमा प्रवेशलाई सहज र सुनिश्चित बनाउन सहयोग गर्नुपर्ने आवाज उठाएको छ ।
सम्मेलनमा उपप्रधानमन्त्री नारायणकाजी श्रेष्ठ र नेपाली प्रतिनिधि मण्डलको संयुक्त राष्ट्रसंघका महासचिव एन्टोनियो गुटेरेसलगायतका विभिन्न देशका नेता एवं पदाधिकारीसँग द्विपक्षीय, बहुपक्षीय छलफल भएको छ ।
सम्मेलनमा अतिकम विकसित, अल्प विकसित र भूपरिवेष्ठित राष्ट्रहरूले कोभिड महामारीपछिको स्थिति कसरी सम्हाल्ने, जलवायु संकटले पैदा गरेका चुनौतीको सामना , वित्तीय चुनौतीको सामना र अन्तर्राष्ट्रिय व्यापारीक प्रबन्धलगायतका कुरामा छलफल भएको उपप्रधानमन्त्री श्रेष्ठले बताए।
सम्मेलनमा भाग लिएर उपप्रधानमन्त्री श्रेष्ठ मंगलबार राति स्वदेश फर्किएका छन् ।
