काठमाडौं । एएफसी एसियन कप छनोटको तयारीमा रहेको नेपालले अन्तर्राष्ट्रिय मैत्रीपूर्ण खेल अन्तर्गत आज (बिहीबार) थाइल्यान्डसँग प्रतिस्पर्धा गर्दैछ ।
थाइल्यान्डको चोनबरीमा नेपाल र थाइल्यान्डबीचको खेल नेपाली समयानुसार साँझ ५ः४५ बजे सुरु हुनेछ ।
आजको खेलपछि नेपालले १३ चैतमा थाइल्यान्डकै चोनबरी एफसीसँग प्रतिस्पर्धा गर्नेछ । दुई मैत्रीपूर्ण खेलका लागि राष्ट्रिय पुरुष फुटबल टोली सोमबार थाइल्यान्ड प्रस्थान गरेको थियो ।
यसअघि नेपालले माघ १५ गते र माघ १८ गते अफ्रिकी राष्ट्र मौरिसससँग दुई मैत्रीपूर्ण खेल खेलेको थियो । जसमा नेपालले दुबै खेल १–० को नतिजासहित आफ्नो पक्षमा पारेको थियो ।
नेपाल एसियन कप छनोटमा समूह ‘ए’ मा रहेको छ । जुन समूहमा कुवेत, इन्डोनेसिया र जोर्डन रहेका छन् ।
नेपालको समूहको छनोट खेलहरु कुवेतमा आयोजना हुनेछ । छनोट खेलहरु जुन ८ देखि १४ सम्म हुनेछ ।
