दमौली, ४ मङ्सिर : तनहुँ कलाकार सङ्घले आयोजना गरेको ‘तनहुँ लोक आवाज–२’ को उपाधि भिमाद नगरपालिका निवासी मन्दिरा थापाले जित्नुभएको छ ।
सङ््घले शुक्लागण्डकी नगरपालिकाको खैरेनीटारमा आयोजना गरेको मौलिक लोकगीत गायन प्रतियोगितामा ११ प्रतिस्पर्धीलाई पछाडि पार्दै थापाले उपाधि जित्नुभयो ।
प्रतियोगितामा घिरिङ गाउँपालिका निवासी बोमाया थापाले द्वितीय, भिमाद नगरपालिका निवासी निशान सुनारले तृतीय र रिसिङ गाउँपालिका निवासी शान्तिमाया थापाले सान्त्वना स्थान हासिल गर्न सफल हुनुभयो ।
उपाधिसँगै विजेताले क्रमशः ३० हजार, १५ हजार, १० हजार र पाँच हजार प्राप्त गर्नुभएको छ । मौलिक लोकगीत संरक्षण गर्ने उद्देश्यले सङ्घले प्रत्येक वर्ष यो कार्यक्रम गर्दै आएको छ ।
पुरस्कार वितरण गर्दै गण्डकी प्रदेशका आन्तरिक मामिला तथा कानूनमन्त्री हरिबहादुर चुमानले गण्डकी प्रदेश विभिन्न संस्कृतिले भरिपूर्ण रहेकाले संस्कृति संरक्षणका लागि प्रदेश सरकारका तर्फबाट पूर्ण सहयोग रहने प्रतिबद्धता जनाउनुभयो ।
गण्डकी प्रदेशसभा सदस्य डोवाटे विक, जिल्ला समन्वय समिति तनहुँका प्रमुख शान्तिरमण वाग्ले लगायतले कलाकारले संस्कृति संरक्षणका लागि थालेको प्रयास उदाहरणीय रहेको चर्चा गर्नुभयो ।
सङ्घका अध्यक्ष यामसागर विकले कलाकारको अधिकार स्थापित गर्दै अग्रज कलाकारलाई सम्मान र अनुज कलाकारलाई प्रोत्साहन गर्न कार्यक्रम आयोजना गरिएको बताउनुभयो ।
सोही अवसरमा तनहुँका प्रगतिशील लोक सर्जक दिलीपकुमार श्रेष्ठलाई यस वर्षको ‘स्रष्टा सम्मान’ प्रदान गरियो ।
प्रतियोगितामा सङ्गीतकार तथा गायक दिवान किनार, खड्ग गन्धर्व, रञ्जिता गुरुङ, कृष्णप्रसाद गौतम र केसीमाया रामदामले निर्णायकको भूमिका निर्वाह गर्नुभएको थियो ।
गत भदौ १६ गतेदेखि शुरु भई विभिन्न चरण पार गर्दै अन्तिम प्रतिस्पर्धामा १२ कलाकारले प्रतियोगितामा आ–आफ्नो प्रतिभा प्रस्तुत गर्नुभएको थियो ।
सोही अवसरमा लोक तथा दोहोरी गीत प्रतिष्ठान नेपालका संस्थापक अध्यक्ष अमरविरही गुरुङले समेत आफ्नो प्रस्तुति राख्नुभएको थियो । (रासस)
