काठमाडौं: कमलपोखरीस्थित रुसी सदनमा नेपाल–रुस साहित्य समाजका महासचिव रामबिन्दु श्रेष्ठद्वारा लिखित पुस्तक ‘नेपाल–रुस : सम्बन्धका पाटाहरू’ भव्य समारोहबीच लोकार्पण गरिएको छ।
नेपाल–रुस साहित्य समाजका अध्यक्ष विष्णुबहादुर सिंहको अध्यक्षतामा सम्पन्न कार्यक्रममा रुसी महासंघको दूतावासका मन्त्री सल्लाहकार रिनचेन राखायेभको प्रमुख आतिथ्यता तथा काठमाडौंस्थित रुसी सदनकी निर्देशक अनास्तासिया भ्यालेन्तिनोभ्ना खोख्लोभाको विशिष्ट आतिथ्यता रहेको थियो।
कार्यक्रममा नेपालभाषा एकेडेमीका कुलपति मल्ल के. सुन्दर, रुसी महासंघका लागि पूर्व नेपाली राजदूतद्वय मिलनराज तुलाधर र हिरण्यलाल श्रेष्ठ, नेपाल–रुस साहित्य समाजका उपाध्यक्ष चन्द्रकान्त आचार्यलगायत साहित्य तथा नेपाल–रुस सम्बन्धसँग जोडिएका विभिन्न व्यक्तित्वहरूको उपस्थिति थियो।
उपस्थित वक्ताहरूले ‘नेपाल–रुस : सम्बन्धका पाटाहरू’ पुस्तकले नेपाल र रुसबीचको ऐतिहासिक, कूटनीतिक, सांस्कृतिक तथा साहित्यिक सम्बन्धका विविध पक्षलाई उजागर गरेको बताए। उनीहरूले कृतिकार तथा कृतिको सफलताको शुभकामना व्यक्त गर्दै दुई देशबीचको साहित्यिक सम्बन्धलाई थप विस्तार गर्नुपर्नेमा जोड दिए।
‘मातृभूमि र प्रेम’का स्रष्टालाई सम्मान
सोही अवसरमा रूस–नेपाल सहयोग तथा मैत्री समाज, मस्कोको तर्फबाट रुस र नेपालका समकालीन नारी स्रष्टाहरूका कविताको द्वैभाषिक संग्रह ‘मातृभूमि र प्रेम’ मा योगदान पुर्याउने नेपाली तथा रूसी नारी स्रष्टाहरूलाई प्रमाणपत्र प्रदान गरी सम्मान गरिएको थियो।
नेपाल र रुसबीच कूटनीतिक सम्बन्ध स्थापना भएको ७०औँ वार्षिकोत्सवका अवसरमा प्रकाशित उक्त संग्रहमा २० नेपाली र २१ रूसी नारी स्रष्टाका कविता समावेश छन्।
संग्रहमा राधिका कल्पित, अल्का मल्ल, सुलोचना मानन्धर, नाज सिंह, गीता त्रिपाठी, शकुन्तला जोशी, प्रगति राई, लक्ष्मी रुम्बा, विमला तुम्खेवा, उषा शेरचन, लक्ष्मी थापालगायत नेपाली स्रष्टाका सिर्जना समेटिएका छन्।
संग्रहकी सम्पादिका तथा संकलनकर्ता तमारा पत्योम्कना नेपाल–रुस सहयोग तथा मैत्री समाजको साहित्यिक आयोगकी अध्यक्षसमेत हुन्।
यसअघि ५ अगस्त २०२६ मा मस्कोस्थित रूसी लेखक संघको ह्वाइट हलमा ‘मातृभूमि र प्रेम’ संग्रहको प्रस्तुति तथा समीक्षा कार्यक्रम सम्पन्न भएको थियो। कार्यक्रममा रूसी लेखक संघकी सचिव नीना डायकोभा, बोर्डको सचिवालयकी उपकार्यकारी सचिव नीना पोपोभा तथा सम्पादिका तमारा पत्योम्कनाले सहभागिता जनाएका थिए।
‘नेपाल–रुस : सम्बन्धका पाटाहरू’ ले दुई देशबीचका सम्बन्धका विविध आयामलाई समेटेको छ भने ‘मातृभूमि र प्रेम’ ले नेपाली र रूसी नारी स्रष्टाका सिर्जनामार्फत दुई देशबीचको साहित्यिक आत्मीयतालाई थप नजिक ल्याउने प्रयास गरेको छ।
‘मातृभूमि र प्रेम’ कविता संग्रहको नेपालमा समेत छिट्टै विमोचन आयोजना गरिने जानकारी दिइएको छ। साहित्य र संस्कृतिमार्फत नेपाल–रुस सम्बन्धलाई थप सुदृढ बनाउने उद्देश्यले यस्ता कार्यक्रमले दुई देशबीचको जनस्तरको सम्बन्ध विस्तारमा समेत योगदान पुग्ने अपेक्षा गरिएको छ।
