हेटौंडा । अस्पताल भर्ना भएका प्रदेश नंबर तीनका मुख्यमन्त्री डोरमणि पौडेलसँग नेकपा अध्यक्ष तथा प्रधानमन्त्री केपी शर्मा ओलीले भेट गरेका छन् ।
प्रधानमन्त्री आलीले मुख्यमन्त्री पौडेललाई अस्पतालमै भेटेर स्वास्थ्य अवस्थाबारे जानकारी लिएका हुन् ।मुख्यमन्त्री पौडेल मुटुको नियमित परीक्षणका लागि काठमाडौंको शहीद गङ्गालाल राष्ट्रिय हृदयरोग निवारण केन्द्रमा आइतबारबाट भर्ना भएका थिए । त्रिहत्तर वर्षीय पौडेल प्रदेशसभा सदस्यमध्ये ज्येष्ठ छन् । निकै सक्रिय दिनचर्या भएका पौडेल बुढ्यौली, उच्च रक्तचाप तथा मधुमेह भए पनि दैनिक १८ घण्टासम्म क्रियाशील रहने जनाइएको छ ।
अस्पतालका मुटुरोग विषेशज्ञ डाक्टर चन्द्रमणि अधिकारीको अनुसार मुख्यमन्त्रीको मुटुको शल्यक्रिया गरिएकोले एक हप्ता आराम गर्नुपर्ने छ । अस्पताल भर्ना भएसँगै एकहप्ताका लागि मुख्यमन्त्रीको सार्वजनिक कार्यक्रमहरु स्थगित गरिएको उनको सचिवालयले जनाएको छ ।
मुख्यमन्त्री पौडेल अस्पताल भर्ना भएपछि यही जेठ २४ र २५ गते हेटौँडामा हुने प्रदेश समन्वय परिषद्को बैठकसमेत प्रभावित हुने भएको छ ।
प्रधानमन्त्री ओलीसँगै उपप्रधान तथा रक्षा मन्त्री इस्वर पोख्रेल, तीन नंब्र प्रदेश प्रमुख अनुराधा कोईरालाले भेट गरेको मुख्यमन्त्रीको सचिवालयले जनाएको छ ।
उनको यसअघि हेटौँडाको सामुदायिक आँखा अस्पतालमा आँखाको मोतीयाविन्दुको शल्यक्रिया गरिएको थियो ।
