काठमाडौं । राष्ट्रिय स्वतन्त्र पार्टी (रास्वपा) ले प्राकृतिक विपद्पछिको खोज, उद्धार तथा राहत वितरणमा सरकारलाई पूर्ण सहयोग गर्ने निर्णय गरेको छ ।
पार्टीको सचिवालय बैठकपछि सञ्चारकर्मीसँग कुरा गर्दै रास्वपाका प्रमुख सचेतक कविन्द्र बुर्लाकोटीले उद्धार र राहतसँगै दीर्घकालीन पुनःस्थापनाका काममा सरकारको क्षमता बलियो बनाउने गरी पार्टी अघि बढ्ने बताउनुभयो ।
सचिवालय बैठकमा राहत वितरणलाई प्रभावकारी र द्रुत बनाउन जोड दिइएको उहाँले जानकारी दिनुभयो । संकलन भएका राहत सामग्री कम्तीमा ७२ घण्टाभित्र प्रभावित नागरिकसमक्ष पुर्याउनुपर्ने रास्वपाको निष्कर्ष रहेको उहाँले बताउनुभयो ।
राहत वितरणमा सरकारले ‘एकद्वार प्रणाली’ अनिवार्य नगरेको विषयमा बुर्लाकोटीले सरकारी संयन्त्रको क्षमताले मात्र सबै प्रभावित क्षेत्रमा तत्काल पुग्न कठिन हुनसक्ने बताउनुभयो । उहाँले क्षमता भएका संघसंस्थाले आवश्यक समन्वयमा प्रभावित क्षेत्रमा प्रत्यक्ष राहत वितरण गर्न सक्ने र वितरण क्षमता नभएका संघसंस्थाले सरकारी संकलन केन्द्रमा राहत सामग्री हस्तान्तरण गर्नुपर्ने धारणा राख्नुभयो ।
सरकार र पार्टीबीचको समन्वयबारे जानकारी दिँदै बुर्लाकोटीले प्रधानमन्त्रीका सल्लाहकारसमेत पार्टीको सचिवालयमा रहेकाले राहत तथा पुनःस्थापनाका विषयमा आवश्यक तयारी र समन्वय भइरहेको बताउनुभयो ।
रास्वपाले विपद्को यस घडीमा राजनीतिक आग्रह–पूर्वाग्रहभन्दा माथि उठेर मानवीय सहायतामा केन्द्रित हुन सबै पक्षलाई आह्वानसमेत गरेको छ ।
