काठमाडौं । फ्रान्समा जारी विश्वकप फुटबलमा अमेरिकाले इतिहासमै फराकिलो गोल अन्तरको जित दर्ता गरेको छ । मंगलबार राती भएको खेलमा अमेरिकाले थाइल्याण्डलाई १३–० ले पराजित गरेको छ ।
पहिलो हाफमा तीन गोल मात्रै गरे पनि दोस्रो हाफमा १० गोल गर्दासम्म थाइल्याण्डले एउटा पनि फर्काउन सकेन । अमेरिकाको जितमा एलेक्स मोर्गनले सबै भन्दा बढि ५ गोल गरिन् ।
खेलको १२ औँ मिनेटमा एलेक्स मोर्गनले गोल गरिन् । उनले बाँकी चार गोल ५३, ७४, ८१ र ८७ औँ मिनेटमा गरेकी हुन् । त्यस्तै रोज लावेली र सामन्था मेविसले दुई दुई गोल गरे । रोजले २० र ५६ औँ तथा सामन्थाले ५० र ५४ औँ मिनेटमा गोल गरेका हुन् ।
लिन्डसी होरनले ३२ औँ, मेगन रापिनोइले ७९ औँ, मालोरी पुग्घले ८४ औँ तथा कार्ली लोयडले इन्जुरी समयको दोस्रो मिनेटमा गोल गर्दै थाइल्याण्डलाई फराकिलो गोलान्तरले पारजित गरेको हो ।
अमेरिकाले सन् १९९१ मा चाइनिज ताइपेलाई विश्वकपमा ७-० गोलअन्तरले पराजित गरेको थियो । यसअघिसम्म यो नै अमेरिकाको सबैभन्दा फराकिलो जित थियो ।
विश्वकपमा सन् २००७ मा जर्मनीले अर्जेन्टिनालाई ११-० गोलअन्तरले पराजित गरेको थियो । यो नै सबैभन्दा ठूलो अन्तरको जितको कीर्तिमान थियो ।
