काठमाडौं । राष्ट्रिय स्वतन्त्र पार्टी (रास्वपा) को केन्द्रीय समितिको बैठक आगामी भाद्र ५ गते शुक्रबार बस्ने भएको छ। पार्टी सभापतिको निर्देशनअनुसार बिहान ११ बजे वनस्थलीस्थित घन्टी घर केन्द्रीय कार्यालयमा बैठक बस्ने महामन्त्री विपिनकुमार आचार्यले जानकारी दिएका छन्।
बैठकमा स्थानीय निर्वाचनका लागि उम्मेदवार छनोट रूपरेखा–२०८३ अनुमोदन गर्ने तथा ‘राइट टु रिकल’ सम्बन्धी दस्तावेज निर्माण गर्ने विषयमा छलफल हुने कार्यसूची रहेको छ।
त्यस्तै, बैठकले केन्द्रीय समिति सदस्य, पदाधिकारी, सचिवालय सदस्य तथा विभागीय प्रमुखहरूको मनोनयनसम्बन्धी निर्णय गर्नेछ। स्थानीय निर्वाचनका लागि केन्द्रीय उम्मेदवार छनोट समिति सदस्य मनोनयन गर्ने विषयसमेत कार्यसूचीमा राखिएको छ।
यस्तै, केन्द्रीय समिति र प्रतिनिधि सभा सदस्यको नेतृत्वमा स्थानीय तहमा ‘उम्मेदवार छनोट रूपरेखा’ सम्बन्धी अभिमुखीकरण तथा प्रशिक्षण कार्यक्रम सञ्चालन गर्ने विषयमा पनि छलफल हुनेछ।
पार्टीको मुखपत्रका रूपमा ‘स्वतन्त्र’ मासिक डिजिटल पत्रिका प्रकाशन गर्ने प्रस्तावसमेत बैठकमा प्रस्तुत हुने रास्वपाले जनाएको छ। बैठकमा अन्य विविध विषयमा पनि छलफल हुने बताइएको छ।
