काठमाडौं । पूर्वराष्ट्रपति विद्यादेवी भण्डारीले लघुवित्त, सहकारी तथा मिटरब्याज पीडितका समस्या सरकारले गम्भीरतापूर्वक लिएर दीर्घकालीन समाधान खोज्नुपर्नेमा जोड दिनुभएको छ ।
मंगलबार ललितपुरको पुल्चोकस्थित राष्ट्रिय मानवअधिकार आयोगको कार्यालय अगाडि धर्नामा रहेका वित्तीय पीडितलाई भेट्दै पूर्वराष्ट्रपति भण्डारीले आन्दोलनरत महिलाको स्वास्थ्य अवस्थाप्रति चासो व्यक्त गर्दै सरकारको ध्यानाकर्षण गराउनुभएको हो ।
उहाँले पीडितका माग र समस्याबारे जानकारी लिँदै समाधानका लागि सरकार गम्भीर बन्नुपर्ने बताउनुभयो । विगतको अन्तरिम सरकारले पीडितसँग गरेका सम्झौता स्मरण गराउँदै भण्डारीले ती सम्झौताको आधारमा वर्तमान सरकारले समस्याको दीर्घकालीन समाधान खोज्नुपर्ने धारणा राख्नुभयो ।
धर्नास्थलमा पीडितहरूसँग कुराकानी गर्दै उहाँले धेरै आमा, दिदीबहिनी र नानीहरू केही दिनदेखि आन्दोलनमा रहेको जानकारी पाएपछि उनीहरूको स्वास्थ्य अवस्था बुझ्न र सम्बन्धित पक्षको ध्यानाकर्षण गराउन आफू आएको बताउनुभयो ।
भण्डारीले सामाजिक न्यायका लागि भइरहेको आन्दोलनप्रति ऐक्यबद्धता जनाउँदै समस्यालाई जरैदेखि समाधान गर्नुपर्ने बताउनुभयो । पीडितहरूले भेटका क्रममा आफ्ना समस्या र पीडा पूर्वराष्ट्रपति भण्डारीसमक्ष राखेका थिए ।
पीडितका तर्फबाट बोल्दै एक सहभागीले आफूहरू चार दिनदेखि धर्नामा रहेको र सुनसरीको इनरुवाबाट कतिपय पीडित १९ दिनसम्म पैदल यात्रा गरेर काठमाडौं आएको जानकारी गराएका थिए । उनीहरूले तत्काल घुम्ती शौचालय तथा सुरक्षित बासस्थानको व्यवस्था गरिदिन समेत आग्रह गरेका थिए ।
लघुवित्त तथा मिटरब्याजका कारण समस्यामा परेका सर्वसाधारणले न्याय र आफ्ना माग सम्बोधनको माग गर्दै केही समयदेखि काठमाडौं केन्द्रित आन्दोलन गर्दै आएका छन् ।
