काठमाडाैँ । पाकिस्तानमा रहेको विश्वको १२औँ अग्लो हिमाल ब्रोड पिकमा हिमपहिरोमा परी बेपत्ता भएका १० आरोहीमध्ये चार जनाको शव फेला परेको छ। हिमपहिरोमा विश्वकीर्तिमानी नेपाली आरोही निर्मल पुर्जा (निम्सदाई)सहित अन्तर्राष्ट्रिय टोली बेपत्ता भएको जनाइएको छ।
अल्पाइन क्लब अफ पाकिस्तानका अध्यक्ष इरफान खानले सामाजिक सञ्जालमार्फत उद्धार टोलीले घटनास्थलबाट हालसम्म चारवटा शव फेला पारेको जानकारी दिएका हुन्। यद्यपि, फेला परेका शवको पहिचान भने अझै खुल्न सकेको छैन।
बेपत्ता आरोहीहरूको खोजी तथा उद्धारका लागि आवश्यक उपकरणसहित उद्धारकर्मी बोकेका हेलिकप्टरहरू ब्रोड पिक क्षेत्रमा परिचालन गरिएको अध्यक्ष खानले बताएका छन्। उनले उद्धार कार्य जारी रहेको जानकारी दिएका छन्।
हिमपहिरोपछि बेपत्ता हुनेमा नेपाली आरोही निर्मल पुर्जा (निम्सदाई), पुरबहादुर गुरुङ (युक्ता), किली पेम्बा शेर्पा (किलु), निमा शेर्पा र नवाङ थिन्दु शेर्पा रहेका छन्।
त्यस्तै, ओमानकी नाधिरा अहमद अब्दुल्लाह अल हार्थी, पाकिस्तानका सोहेल साखी, चीनका वाङ जोङ र अमेरिकाकी मेलोरी गिस पनि बेपत्ता रहेको जनाइएको छ। उद्धार अभियानमा बेपत्ता आरोहीहरूको अवस्थाबारे थप जानकारी प्राप्त गर्ने प्रयास भइरहेको छ।
