काठमाडौं । साउदी अरबका राजाको अंगरक्षकको गोली हानी हत्या भएको छ । अब्दुल अजिज अल फागम साउदी अरबका पूर्व नरेश अब्दुल्लाह विन अब्दुल्लाजिज अल साउदका पनि अंगरक्षक रहिसकेका थिए । जेद्दाहस्थित साथीको घरमा गएको बेला उनको हत्या भएको साउदी प्रेस एजेन्सीले जनाएको छ ।
उनको साथी र उनी बिच चर्को भनाभन भएपछि गोली हानेर अल फागमको हत्या गरेको प्रहरीले जनाएको छ । घटनाको पुष्टि मक्का प्रहरीका प्रवक्ताले गरेका छन् । ती व्यक्तिले आफ्नै भाइ र एक फिलिपिनी कामदारमाथि पनि गोली चलाएका थिए जसकारण उनीहरु पनि घाइते अवस्थामा छन् ।
उनले घटनास्थल पुगेका प्रहरीमाथि पनि गोली चलाएको र पाँच जना प्रहरीसमेत घाइते भएको मक्का प्रहरीले बताएका छन् । ती व्यक्तिलाई गोली हानेर प्रहरीले मारेको छ । यसबारे थप जानकारी अनुसन्धानपछि बाहिर आउने बताईएको छ ।
