काठमाडौं । नेपाली कांग्रेसका सभापति गगनकुमार थापाले पार्टीको विधान, संविधान र अदालतको आदेशअनुसार तोकिएकै समयभित्र पार्टीको १५औँ महाधिवेशन सम्पन्न गर्नुपर्ने बताउनुभएको छ ।
मंगलबार ललितपुरको सानेपास्थित पार्टी केन्द्रीय कार्यालयमा आयोजित कार्यक्रममा बोल्दै सभापति थापाले समयको चापलाई ध्यानमा राख्दै निर्धारित कार्यतालिकाअनुसार महाधिवेशनका सबै प्रक्रिया अघि बढाउन निर्देशन दिनुभयो । उहाँले कांग्रेस अहिले संवैधानिक व्यवस्था, पार्टीको विधान र अदालतको फैसलाले बाँधिएको उल्लेख गर्नुभयो ।
सभापति थापाले यसपटक क्रियाशील सदस्यताको विवरण डिजिटलाइज्ड भएकाले विगतको तुलनामा महाधिवेशन प्रक्रिया केही सहज हुने अपेक्षा गरिएको बताउनुभयो । तर, सदस्यता विवरणदेखि अधिवेशनका अन्य प्रक्रियासम्म कुनै पनि प्रकारको अनियमितता र पूर्वाग्रह हुन नहुनेमा उहाँले सचेत गराउनुभयो ।
महाधिवेशनको औपचारिक प्रक्रिया प्रारम्भ भइसकेको जानकारी दिँदै उहाँले निर्वाचन समितिले तय गरेको कार्यतालिकालाई पूर्ण रूपमा पालना गरिने स्पष्ट पार्नुभयो । केन्द्रीय कार्यसमितिले असोज १६ गते महाधिवेशनको अन्तिम मिति र स्थान तय गरिसकेकाले सोही मितिलाई आधार बनाएर जिल्ला तथा अन्य तहका अधिवेशन सञ्चालन गर्न उहाँले आग्रह गर्नुभयो ।
सभापति थापाले भन्नुभयो, “अदालतले असोज १६ गतेलाई महाधिवेशनको अन्तिम आधार मानेको छ। त्यसैले हामीसँग अब समयको सुविधा छैन । हामीले अत्यन्तै छोटो अवधिभित्र सबै प्रक्रिया टुङ्ग्याउनुपर्ने चुनौती छ । अधिवेशनको प्रक्रिया टुङ्गिँदै गर्दा कुनै पनि प्रश्न नउठ्ने गरी निष्पक्ष र पारदर्शी ढङ्गले काम सम्पन्न गर्नुपर्नेछ ।”
जिल्ला तहमा हुने अधिवेशनमा कानून व्यवसायी, शिक्षक, प्राध्यापक लगायत विभिन्न पेशाकर्मीलाई समेत सहभागी गराई प्रक्रिया थप व्यवस्थित बनाउनुपर्नेमा सभापति थापाले जोड दिनुभयो ।
विधानमा भएका नयाँ व्यवस्था, निर्वाचन निर्देशिका तथा नियमबारे स्पष्ट भएर अघि बढेमा भविष्यमा आउन सक्ने कानूनी जटिलता न्यूनीकरण गर्न सकिने उहाँको भनाइ थियो । उहाँले निर्वाचन समितिलाई आफ्नो जिम्मेवारी कुशलतापूर्वक निर्वाह गर्न आग्रह गर्दै महाधिवेशन प्रक्रियामा सबै पक्षले अपनत्व महसुस गर्ने वातावरण निर्माण हुने विश्वास व्यक्त गर्नुभयो ।
