काठमाडौं । काठमाडौंको कालीमाटीस्थित फलफूल तथा तरकारी बजारमा गरिएको विषादी अवशेष परीक्षणका क्रममा रायोको सागमा मापदण्डभन्दा बढी विषादी भेटिएको छ।
कृषि विभागअन्तर्गतको केन्द्रीय कृषि प्रयोगशालाको विषादी अवशेष द्रुत विश्लेषण प्रयोगशाला एकाइले मंगलबार बिहान गरेको परीक्षणमा भक्तपुरको मध्यपुर थिमी नगरपालिकाबाट बजारमा ल्याइएको रायोको सागमा अर्गानोफस्फेट समूहको विषादीको मात्रा ५०.०१६० प्रतिशत फेला परेको हो।
प्रयोगशालाका अनुसार उक्त मात्रा स्वीकृत सीमाभन्दा बढी भएकाले रायोको सागलाई उपभोगका लागि अयोग्य ठहर गर्दै नष्ट गर्नुपर्ने (विसर्जन) श्रेणीमा वर्गीकरण गरिएको छ।
आज गरिएको परीक्षणमा कुल १२ वटा तरकारीका नमुना समावेश थिए। तीमध्ये रायोको साग, हरियो प्याज, निगुरो, काँक्रो, हरियो धनियाँ, घिरौँला र गोलभेँडालगायतका नमुनाको परीक्षण गरिएको थियो। रायोको सागबाहेक अन्य ११ वटा नमुनामा भने विषादीको मात्रा सुरक्षित सीमाभित्र रहेको प्रयोगशालाले जनाएको छ।
प्रयोगशालाले निर्धारण गरेको मापदण्डअनुसार ३५ प्रतिशतभन्दा कम विषादी अवशेष भएका तरकारी उपभोगका लागि सुरक्षित मानिन्छन्। ३५ देखि ४५ प्रतिशतसम्म विषादी देखिएमा त्यस्ता तरकारी केही दिन क्वारेन्टाइनमा राखेर पुनः परीक्षण गरिन्छ। ४५ प्रतिशतभन्दा बढी विषादी भेटिएमा भने ती तरकारीलाई खान अयोग्य मान्दै पूर्ण रूपमा नष्ट गर्ने व्यवस्था रहेको छ।
प्रयोगशालाले हाल सञ्चालन भइरहेको द्रुत परीक्षण कार्बामेट र अर्गानोफस्फेट समूहका कीटनाशक विषादीको अवशेष मापनमा मात्र केन्द्रित रहेको स्पष्ट पारेको छ।
