काठमाडौँ । प्रतिनिधिसभाको बैठकमा श्रम संस्कृति पार्टीका अध्यक्ष हर्क साम्पाङले प्रधानमन्त्री बालेन शाहको उपस्थितिबारे प्रश्न उठाउँदै हाजिरीसम्बन्धी व्यवस्था कार्यान्वयन गर्न माग गरेका छन् ।
बैठक सञ्चालनका क्रममा साम्पाङले संसदीय नियमावलीको व्यवस्था स्मरण गराउँदै सांसदहरूको अनिवार्य उपस्थितिलाई जोड दिएका हुन् । नियमअनुसार बैठक कक्षमा प्रवेश गर्नुअघि सदस्यहरूले उपकक्षमा रहेको हाजिरी पुस्तिका वा विद्युतीय प्रणालीमार्फत उपस्थिति जनाउनुपर्ने व्यवस्था रहेको उल्लेख गर्दै उनले सो प्रक्रिया सबैमा समान रूपमा लागू हुनुपर्ने तर्क राखे ।
सोही सन्दर्भमा उनले प्रधानमन्त्री बालेन शाह संसद्को बैठकमा उपस्थित भए–नभएको विषय उठाउँदै प्रश्न गरे । उनले उपस्थित नभएको अवस्थामा प्रतिनिधिसभाको सदस्यताको वैधानिकतामाथि प्रश्न उठ्न सक्ने दाबीसमेत गरे ।
साम्पाङले उपस्थितिको अभावमा सांसद पदको अवस्था स्वतः प्रभावित हुने टिप्पणी गर्दै त्यसको संवैधानिक असरबारे पनि ध्यान दिनुपर्ने धारणा राखे । साथै, उनले नेपाल–भारत सीमासम्बन्धी विषयमा सरकारको स्पष्ट धारणा सार्वजनिक गर्नुपर्ने मागसमेत राखे । सीमा अतिक्रमणका विषयमा तथ्यगत जानकारी दिन र कुनै कमजोरी भएको भए सार्वजनिक रूपमा माफी माग्नुपर्ने उनको आग्रह थियो ।
प्रतिनिधिसभाको बैठकमा उठाइएको यो विषयले फेरि एकपटक संसदीय उपस्थिति, उत्तरदायित्व र सीमा विवादबारे राजनीतिक बहस चर्काएको देखिएको छ ।
