काठमाडौँ । अविरल वर्षासँगै आएको बाढी र पहिरोका कारण गण्डकी प्रदेशसहित देशभरको जनजीवन प्रभावित भएको छ। बाढीले स्याङ्जा र गुल्मी जोड्ने पक्की पुल बगाएको छ भने प्रदेशका विभिन्न जिल्लाका प्रमुख राजमार्ग तथा सडक खण्ड अवरुद्ध भएका छन्।
स्याङ्जाको कालीगण्डकी गाउँपालिका–७ मिर्मी र गुल्मीको कालीगण्डकी गाउँपालिका–१ हर्मिचौर जोड्ने पक्की पुल बाढीले बगाएको हो। पुल बगेसँगै दुई जिल्लाबीचको आवागमन प्रभावित भएको छ।
निरन्तरको वर्षाका कारण गण्डकी प्रदेशका प्रमुख नदी तथा खोलामा जलसतह बढेर खतराको तह पार गरेको छ। पर्वतको कालीगण्डकी, लमजुङको चेपे खोला तथा म्याग्दी क्षेत्रमा नदीको बहाव बढेपछि तटीय क्षेत्रका बासिन्दालाई उच्च सतर्कता अपनाउन आग्रह गरिएको छ।
बाढीपहिरोका कारण बेँसीसहर–चामे, जोमसोम–कोरला, पोखरा–बागलुङ, बेनी–जोमसोम, मध्यपहाडी लोकमार्ग र कालीगण्डकी करिडोरलगायतका प्रमुख तथा सहायक सडक अवरुद्ध भएका छन्।
तनहुँको पृथ्वी राजमार्गअन्तर्गत घाँसीकुवा खण्डमा खसेको पहिरो हटाउन नेपाली सेनाको कालीभञ्जन गणबाट खटिएको टोलीले काम गरिरहेको छ।
यसैबीच, विपद्को जोखिम बढेपछि सुरक्षा निकायले पूर्वतयारी तथा उद्धारका लागि आवश्यक व्यवस्थापन तीव्र पारेका छन्। पर्वतको घारखोला क्षेत्रमा नदीको बहाव उच्च भएपछि नयाँ रणभीम गुल्मको सुरक्षा पोस्टलाई सुरक्षित स्थानमा स्थानान्तरण गरिएको छ।
कास्कीको पञ्चासे, तनहुँको कोटेगाउँ, स्याङ्जाको पञ्चमुल र म्याग्दीको दरबाङलगायत क्षेत्रमा वर्षाको मात्रा सतर्कता तहभन्दा माथि पुगेको छ।
सम्बन्धित जिल्ला प्रशासन तथा सुरक्षा निकायले जोखिमयुक्त क्षेत्रमा रहेका सर्वसाधारणलाई सतर्क रहन तथा अत्यावश्यक कामबाहेक यात्रा नगर्न आग्रह गरेका छन्।
