च्याम्पियन्स लिग फुटबलमा जर्मन क्लब बोरुसिया डर्टमण्डले पुनरागमन जित निकालेको छ ।समूह चरण अन्तर्गत बुधबार राति डर्टमण्डले ३–२ गोल अन्तरले इटालियन क्लब इन्टर मिलानलाई पराजित गरेको हो । घरेलु मैदानमा २–० गोलले पछि परेको स्थिति उल्टाएर डर्टमण्डले उत्कृष्ट जित निकालेको हो । लाउटारो मार्टिनेजले खेलको पाँचौं मिनेटमा गोल गर्दै इन्टरलाई अग्रता दिलाएका थिए ।
४० औं मिनेटमा माटियास भेसिनोले गोल गर्दै इन्टरलाई २–० को अग्रता दिलाएका हुन् । तर, दोस्रो हाफमा डर्टमण्डले उत्कृष्ट पुनरागमन गर्यो । अर्चार्फ हाकिमीले खेलको ५१ औं मिनेटमा गोल गर्दै डर्टमण्डलाई खेलमा फर्काउने कोशिस गरेका थिए । ६४ औं मिनेटमा जुलियन ब्रान्टले गोल गर्दा डर्टमण्डले खेल २–२ को बराबरीमा ल्याउन सक्यो ।
त्यसपछि हाकिमीले खेलको ७७ औं मिनेटमा व्यक्तिगत दोस्रो गोल गर्दै डर्टमण्डलाई ३–२ को उत्कृष्ट जित दिलाए । जितसँगै समूह ‘एफ’ को डर्टमण्ड समूहको दोस्रो स्थानमा उक्लिएको छ । डर्टमण्डले ४ खेलमा ७ अंक जोडेको छ । ४ अंक जोडेको इन्टर तेस्रो स्थानमा छ । यस समूहमा ८ अंक जोडेर बार्सिलोना शीर्ष स्थानमा छ ।
