काठमाडौँ । पौष्टिक गुणस्तरीय खाद्य तथा बीउ उत्पादनका क्षेत्रमा एकआपसका ज्ञान आदानप्रदान गर्न क्षेत्रीय बैठक शुरु भएको छ । नेपाल कृषि सहकारी केन्द्रीय सङ्घ लिमिटेडको संयोजनमा नेपालमा पहिलोपटक आयोजत सो दुईदिने बैठकमा नेपालसहित नेदल्याण्ड, भारत, भियतनाम, बङ्गलादेश, भूटानको सहभागिता रहेको छ ।
बैठकमा वातावरणलाई असर नपुर्याइ बीउको विविध क्षेत्रमा दिगो विकास विषयमा पनि सहभागी देशले गरिरहेका प्रयासका बारेमा कार्यपत्र एवं आगामी रणनीति तय गरिने जनाइएको छ । साथै बीउ उद्योगका अवस्था तथा बीउ उत्पादन गर्ने कृषकका क्षमता विकासका विषयमा पनि बैठकका कार्यसूची रहेका छन् ।
कृषि तथा पशुपक्षी मन्त्रालयका सचिव युवकध्वज जिसीले बैठकको शुभारम्भ गर्दै खाद्य सुरक्षा बढाउँदै भोकमरी अन्त्य गरी दिगो विकासका लक्ष्य पूरा गर्न मन्त्रालयले नीति बनाई लागू गरेको जानकारी दिनुभयो ।
उहाँले भन्नुभयो, “स्थानीय जातको बीउ लोप हुन नदिन र आयातित बीउको जथाभावी प्रयोग हुन नदिन सरकार सचेत रहेको छ । स्तरीय बीउमा कृषकको पहुँच बढाउन सामूहिक प्रयास गर्नुपर्छ ।”
आयोजक संस्थाका अध्यक्ष खेमबहादुर पाठकले राम्रो बीउको अभावले कृषकले समस्या व्यहोर्नु परिरहेको चर्चा गर्दै स्तरीय बीउ उत्पादनमा सरकारी लगानी बढाउनुपर्छ भन्नुभयो । बैठकको उद्घाटनसत्रमा नेदल्याण्डका विज्ञद्वय इगो फरोगान र एल्स फान डेलले कृषि उत्पादन वृद्धि गर्न गुणस्तरीय बीउमा लगानी बढाउन सुझाव दिनुभयो ।
