काठमाडौं । गत बुधबार साँझ इटहरी १ हलगाडास्थित मोहन विश्वकर्माको घरमा पालेको जर्मन सेफर्ड प्रजातिको कुकुरलाई काटेर मार्ने ३ जना अभियुक्तलाई पक्रिन प्रहरीले तालीम प्राप्त कुकुर नै परिचालन गर्ने भएको छ ।
गत बुधबार विश्वकर्माका छोरा आयुष विश्वकर्मासंग सामान्य भनाभन भएकोमा साँझ ७ वजेतिर इटहरीकै विशाल माझि, मनोज भण्डारी र सुदिन राईले आयुषलाई आक्रमण गर्ने उद्धेश्यले हाततियार सहित आयुषको घरमा गएका थिए ।
आयुषलाई नभेटेपछि अभियुक्तहरुले आयुषको घरको भर्यांगमा बाँधेको जर्मन सेफर्ड कुकुरलाई काटेर भागेकोमा सोही चोटका कारण विहीबार कुकुर मरेको थियो । घरपालुवा कुकुर मरेपछि घरधनी मोहन विश्वकर्माले इटहरी प्रहरीमा ती तीनैजना अभियुक्तको विरुद्धमा किटानी जाहेरी दिएका थिए ।
“घटनापछि तीनैजना अभियुक्तहरु भागेका छन, उनीहरुलाई सादा पोशाकका प्रहरीले खोजी राखेका छन, केही दिनभित्र उनीहरु नभेटिए या उनीहरुले आत्मसर्मपण नगरेमा उनीहरुलाई तालीम प्राप्त कुकुरबाटै खोजिनेछ”-इटहरी प्रहरी प्रमुख, प्रहरी नायव उपरिक्षक धर्मराज भण्डारीले न्यूज पोलारसंग भने ।
