केरला, भारत । नेपाली कांग्रेसका सहमहामन्त्री एवम् पूर्व परराष्टमन्त्री डा.प्रकाशशरण महतले दक्षिण एसियाली नागरिकहरु एक विशिष्ठ भौगोलिक पहिचानका भएकोले यस क्षेत्रका सबै मुलुकहरूबीच आपसी सम्बन्धलाई थप नजिक बनउनुपर्नेमा जोड दिएका छन् । उनले भने- आपसी सम्झदारी,भाइचारा,समानता र सहिष्णुता बढाएर दक्षिण एसियाली क्षेत्रका सबै देश र जनता बिचको दुरीलाई कम गर्नुपर्दछ ।
शुक्रबार भारतको केरलामा सुरु भएको साउथ एसियन फ्राटर्निटी, साफको २९ औँ सम्मेलनलाई प्रमुख अतिथिका रुपमा सम्बोधन गर्दै सहमहामन्त्री डा महतले यस क्षेत्रका विभिन्न देशमा बस्ने नागरिकहरुले एक अर्काको धर्म सँस्कृती र रितिरिवाजलाई सम्मान गर्दै फरक समुदायका बिचमा पनि समानता खोज्नुपर्नेमा जोड दिएका छन् ।
सहमहामन्त्री डा.महतले गौतम बुद्धको जन्मस्थल नेपालमा विभिन्न जातजाति, धर्म, भाषा र विविध सम्प्रदायहरु रहेको उल्लेख गर्दै यस अवस्थालाई आपसी भाइचाराको एक अनुपम उदाहरणको रुपमा लिनुपर्ने बताए । नेपालमा हिन्दु,बौद्ध,इसाई,मुस्लिम लगायतका विभिन्न धर्म र सम्प्रदायका नागरिकहरु रहेको र यसबीचको सहिष्णुता सबैका लागि एक अनुकरणीय उदाहरण हो उनको धारणा थियो ।
उनले एउटा समुदायले अर्को समुदायलाई र एउटा धर्मले अर्को धर्मलाई सम्मान गरेर मात्रै विश्वमा शान्ति प्राप्तहुने जिकिर गरे । साफको सम्मेलनको अध्यक्षता भारतका प्रसिद्ध चिन्तक श्री सत्य पालले गरेका थिए भने सम्मेलनमा नेपाल, भारत, बंगलादेश, श्रीलंका, भुटान लगायतका मुलुकबाट १५० जना प्रतिनिधिले भाग लिएका छन् ।
उक्त सम्मेलन भाइचाराको निर्माण गर्न र दक्षिण एसियाली क्षेत्रका सबै देशका नागरिकमा सुमधुर सम्बन्धको विकास गर्न केन्द्रित थियो । ‘पर्खाल भत्काउँ पुल बनाउँ’ नारा दिइएको सो सम्मेलनमा डा.महतले त्यहाँ उपस्थित सबैलाई दक्षिण एसियाका सबै देशका नागरिकहरुले आपसी साझेदारी र भाइचाराका माध्यमबाट भाइचारा र समानताको सम्बन्ध विकास गर्न सकिने सुझाव दिएका थिए ।
